جدہ : اسلامی تعاون تنطیم نے سوئیڈن اور ڈنمارک میں قرآنِ پاک کی بے حرمتی کے واقعات پر رکن ممالک کے وزرائے خارجہ کونسل کا ہنگامی اجلاس طلب کر لیا۔
تفصیلات کے مطابق اسلامی تعاون تنطیم نے سوئیڈن اور ڈنمارک میں قرآنِ پاک کی بے حرمتی کے واقعات پر رکن ممالک کے وزرائے خارجہ کونسل کا اہنگامی اجلاس طلب کر لیا۔
سعودی عرب اور عراق کی درخواست پر غیر معمولی ورچوئل اجلاس منعقد ہوگا، جس میں سوئیڈن اور ڈنمارک میں قرآنِ پاک کے نسخوں کی بے حرمتی کے بار بار ہونے والے واقعات پر تبادلہ خیال کیا جائے گا۔
اس سے قبل پاکستان اور دیگر مسلم ممالک نے ڈنمارک کے دارالحکومت کوپن ہیگن میں قرآن پاک کی بے حرمتی کی شدید مزمت کی تھی۔
یاد رہے سوئیڈن کے بعد ڈنمارک کے دارلحکومت کوپن ہیگن میں عراقی سفارتخانے کے باہر ملعون شخص نے قرآن حکیم کی بے ادبی کی اور اسے نقصان پہنچایا تھا۔
ڈنمارک کے وزیر خارجہ لارس راسموسن نے قرآن مجید کی اہانت کو احمقانہ اقدام قرار دیتے ہوئے کہا تھا کہ دوسروں کے مذہب کی توہین کرنا افسوسناک عمل ہے اور اس طرح کے اقدامات نہیں ہونے چاہئیں۔
ڈینش وزیر خارجہ کا کہنا تھا کہ قرآن یا دوسری مذہبی کتابوں کی بے حرمتی کا مقصد اشتعال انگیزی اور تقسیم پیدا کرنا ہے۔
اس سے قبل عیدالاضحیٰ پر سوئیڈن میں مسجد کے باہر قرآن پاک کی بے حرمتی کی گئی تھی جب کہ چند روز قبل یہ ناپاک جسارت دوبارہ کی گئی تھی اور دونوں بار اس کی سرکاری سطح پر اجازت دی گئی تھی۔
سوئیڈن میں اس ملعون حرکت پر عالم اسلام میں شدید غم وغصہ پھیل گیا تھا اور مسلم حکومتوں کی جانب سے سرکاری سطح پر احتجاج کے ساتھ دنیا بھر میں مسلمان سڑکوں پر نکل آئے تھے۔
