اسلام آباد: وفاقی وزیر توانائی کا کہنا ہے کہ 10 سالوں کے دوران تیل اور گیس کے دریافت ہونے والے ذحائر کی تعداد 160 ہے، فیصل واوڈا کا کہنا تھا کہ بھاشا اور مہمند ڈیمز کے فنڈز میں10 ارب 40 کروڑ سے زائد روپے جمع ہوچکے ہیں ۔
تفصیلات کے مطابق آج بروز جمعہ سینٹ کا اجلاس صادق سنجرانی کی صدارت میں ہوا جس میں وزیر توانائی عمر ایوب خان نے تحریری جواب میں بتایاکہ گزشتہ 10 سالوں کے دوران تیل اور گیس کے دریافت ہونے والے ذخائر کی تعداد 160 ہے۔ انہوں نے کہاکہ سب سے زیادہ ذخائر سندھ سے دریافت کئے گئے،پنجاب میں 13،خیبرپختونخوا میں 13 جبکہ بلوچستان سے 3 ذخائر دریافت کئے گئے۔
کیکڑا ون نامی زیر سمندر ڈرلنگ سائٹ پر بریفنگ دیتے ہوئے ان کا کہنا تھا کہ اس مقام پر ڈرلنگ ابھی جاری ہے۔ چار ہزار آٹھ سو میٹر گہرائی تک ڈرلنگ کی جاچکی ہے جبکہ تیل کا کنواں انتہائی گہرے پانیوں میں 5 ہزار چھ سو ساٹھ میٹر کی گہرائی میں موجود ہے۔
ان کا کہنا تھا کہ ایکسون موبل کے عہدیداران سے ہونے والی حالیہ ملاقات میں انہیں یقین دہانی کرائی گئی ہے کہ جلد ہی تیل کا ذخیرہ نکل آئے گا۔
اسی اجلاس میں چیف جسٹس، وزیراعظم فنڈ برائے تعمیر دیامر بھاشا ڈیم اور مہمند ڈیمز معاملہ پر وزیر برائے آبی وسائل فیصل واوڈا نے سینٹ میں تحریری جواب جمع کرادیا ۔ جواب میں بتایاگیاکہ سپریم کورٹ کی ویب سائٹ کے مطابق 10 ارب 40 کروڑ 57 لاکھ 773 روپے بھاشا اور مہمند ڈیمز کے فنڈز میں جمع ہوچکے ہیں ،وزیراعظم کی جانب سے مئی کے مہینے میں اس منصوبے کا انعقاد کردیا جائےگا۔
انچارج برائے پرائم منسٹر ہاوس نے سینٹ میں تحریری جواب میں کہاکہ پاکستان سٹیزن پورٹل 28 اکتوبر 2019 کو شروع کیا گیابتایاگیا کہ 13 اپریل 6 لاکھ 20 یزار 588 شکایات موصول ہوئیں،4 لاکھ 64 ہزار 562 شکایات حل کردی گئیں ۔
مجموعی طور پر 75 فیصد شکایات حل کردی گئیں، بتایاگیاکہ صرف 25 فیصد مطلب ایک لاکھ 56 ہزار 26 شکایات اس وقت زیر التوا ہیں۔ یہ بھی بتایاگیاکہ شکایات حل کرنے کیلئے کم از کم 20 اورزیادہ سے زیادہ 40 روزدرکار ہوتے ہیں۔
