فیصل آباد: پنجاب کے شہر فیصل آباد میں آئل فیکٹری میں خوفناک آگ بھڑک اٹھی جس کے نتیجے میں 5 مزدور جاں بحق ہوگئے۔
اے آر وائی نیوز کی رپورٹ کے مطابق فیصل آباد میں آئل فیکٹری میں خوفناک آتشزدگی کے نتیجے میں 5 مزدور جاں بحق اور 5 زخمی ہوگئے، فیکٹری میں لگنے والی آگ پر 5 گھنٹے بعد قابو پالیا گیا۔
ریسکیو ذرائع کا کہنا ہے کہ فیکٹری سے مزید تین ملازمین کی جھلسی ہوئی لاشیں نکال لی گئی ہیں جس کے بعد واقعے میں جاں بحق مزدوروں کی تعداد 5 ہوگئی ہے۔
ریسکیو ذرائع کے مطابق فیکٹری میں کولنگ کا عمل جاری ہے، 5 زخمی ملازمین کو الائیڈ اسپتال کے برن یونٹ منتقل کردیا گیا ہے جہاں انہیں طبی امداد فراہم کی جارہی ہے۔
رپورٹ کے مطابق آگ لگنے کے وقت فیکٹری میں ایک لاکھ لیٹر آئل موجود تھا، آئل کی بھاری مقدار کے باعث آگ بار بار بھڑک رہی تھی۔
فائر بریگیڈ کی 12 گاڑیوں نے فیکٹری میں لگی آگ بجھانے میں حصہ لیا۔
