منیلا: فلپائن میں آئل ٹینکر ڈوبنے سے سمندر میں تیل پھیل گیا، جس کی وجہ سے 7 شہروں میں ماہی گیری پر پابندی عائد کر دی گئی ہے۔
ایسوسی ایٹڈ پریس کے مطابق فلپائن میں آئل ٹینکر کے ڈوبنے کے نتیجے میں سمندر میں تیل پھیل گیا ہے، ٹینکر میں 8 لاکھ لیٹر تیل موجود تھا، سی این این فلپائن کے مطابق آئل ٹینکر ڈوبنے سے اورینٹل منڈورو کے ساحل پر مچھلیاں اور سمندری پرندے مرنے لگے ہیں۔
فلپائنی حکام نے جمعرات کو بتایا کہ دارالحکومت کے جنوب مغرب میں ڈوبنے والے فلپائنی ٹینکر سے تیل کے اخراج کے باعث کم از کم سات ساحلی شہروں میں ماہی گیری اور تیراکی پر پابندی عائد کر دی گئی ہے۔
فلپائنی کوسٹ گارڈ نے بتایا کہ ڈوبتے وقت ’ایم ٹی پرنسز ایمپریس‘ نامی جہاز میں عملے کے 20 ارکان سوار تھے اور تقریباً 2 لاکھ 10 ہزار گیلن تیل موجود تھا، سفر کے دوران جہاز کا انجن زیادہ گرم ہونے کے بعد ڈوب گیا۔
ٹینکر ڈوبنے کے بعد سمندر میں تیل بہنے کے باعث ماحولیات کو شدید خطرہ لاحق ہو گیا ہے، فلپائنی حکام نے ٹینکر کی تلاش اور تیل کے بہاؤ کو روکنے کی کوششیں شروع کر دی ہیں۔
LOOK: Submerged oil tanker MT Princess Empress leaves behind dead fish and seabirds on the shores of Oriental Mindoro.
📸 Philippine Information Agency-Mimaropa pic.twitter.com/qIMR0ob56y
— CNN Philippines (@cnnphilippines) March 3, 2023
کوسٹ گارڈ حکام کے مطابق عملے کو قریب سے گزرنے والے ایک غیر ملکی مال بردار جہاز نے بچایا اور ساحل پر پہنچایا۔ تیل کے رساؤ سے بدھ تک نوجان شہر سے تقریباً 6 کلومیٹر لمبا اور 4 کلومیٹر چوڑا سمندر کا ایک حصہ متاثر ہو گیا ہے۔
