کراچی : سی ویو کے قریب پاکستان ریفائنری کی لائن پُراسرار طور پر پھٹنے سے فرنس آئل سروس روڈ پر پھیل گیا۔
تفصیلات کے مطابق کراچی میں سی ویو کےقریب پاکستان ریفائنری کی لائن پُراسرار طور پر پھٹ گئی، جس سے فرنس آئل سروس روڈ پر پھیل گیا۔
پولیس اورمتعلقہ ادارے موقع پر پہنچ گئے جبکہ لائن کی مرمت اور معاملے کی تحقیقات شروع کردی گئی ہے۔
آئل ریفائنری کے ذرائع کا کہنا ہے کہ آئل بہنے کی اطلاع پر تیل کی پمپنگ رکوا دی گئی تھی اور سروس روڈ کو آمدورفت کے لیے بند کردیا گیا تھا۔
ذرائع نے بتایا کہ صورتحال کو سنبھالنے کے لیے سڑک پر پھیلے ہوئے تیل کو جذب کرنے اور خشک کرنے کے لیے ریت کا استعمال کیا جا رہا ہے۔
حکام کا کہنا تھا کہ مختلف کمپنیوں کی متعدد پائپ لائنیں اس علاقے سے گزرتی ہیں، تباہ شدہ لائن کی مرمت کے لیے کھدائی کا کام شروع کر دیا گیا ہے، تاہم نقصان کی حد کا تعین مزید تحقیقات کے بعد ہی کیا جائے گا۔
