مسقط:عمان نے سائنس اینڈ ٹیکنالوجی میں اہم سنگ میل حاصل کرتے ہوئے مقامی طور پرتیار کردہ لیپ ٹاپ متعارف کرایا ہے، لیپ ٹاپ عربی رسم الخط کو خاص طور پر شامل کیا گیا ہے۔
غیر ملکی خبر رساں ایجنسی کے مطابق عمان کی وزارت برائے ٹرانسپورٹ ، مواصلات اور انفارمیشن ٹیکنالوجی (ایم ٹی سی آئی ٹی) نے لیپ ٹاپ کو مقامی میڈیا کے سامنے پیش کیا۔
جدید لیپ ٹاپ کو (ایم ٹی سی آئی ٹی) کے تعاون سے عمانی نوجوانوں کے ایک گروپ نے تیار کیا، لیپ ٹاپ کا ڈیزائن جدید ترین تقاضوں سے ہم آہنگ ہے،جس میں ہلکے وزن کے ساتھ ساتھ خصوصی طور پر آئی ڈی کارڈ ریڈر کو ون ٹچ کے زریعے ٹیبلٹ ڈیوائس میں تبدیل کرنے کا آپشن شامل کیا گیا ہے.
اس کے علاوہ 4G ، 3G نیٹ ورک کے ساتھ نینوسم کارڈ کا استعمال بھی اس کے فیچرز میں شامل کیا گیا ہے،لیپ ٹاپ کو العنصر کا نام دیا گیا ہے۔
یہی نہیں لیپ ٹاپ میں عربی رسم الخط کی تراکیب کو بھی شامل کیا گیا ہے، جوکہ اس لیپ ٹاپ کو مزید جدت فراہم کرتی ہے۔
عمان کی وزارت برائےانفارمیشن ٹیکنالوجی نے میڈیا کو بتایا کہ مذکورہ کمپنی نے دنیا میں پھیلی کورونا وائرس کی وبا کے باعث یہ لیپ ٹاپ بنانے کا فیصلہ کیا، جس کا مقصد عمان کے دور دراز علاقوں میں رہنے والے افراد کو کام اور تعلیم کے مواقع فراہم کرنا ہے۔
