اسلام آباد : پاکستان تحریک انصاف کے رہنما عمر ایوب نے دعویٰ کیا ہے کہ پی ٹی آئی اسمبلی میں 180 کا نمبر دکھائے گی اور حکومت بنائے گی،آپ دیکھتے رہیں۔
تفصیلات کے مطابق پاکستان تحریک انصاف کے رہنما عمر ایوب نے اے آر وائی نیوز کے پروگرام میں گفتگو کرتے ہوئے سابق کمشنر راولپنڈی کے بیان پر کہا کہ لیاقت چٹھہ نے بھانڈا پھوڑا،سچ سامنےآیا، پشاورمیں بھی ہمارے 8 ممبران کاغلط فارم47 جاری کیا گیا اور ایم کیوایم نے فارم 47 کے ذریعے دھاندلی کرکے پی ٹی آئی کوہرایا۔
عمر ایوب نے بتایا کہ آئندہ دنوں میں لیاقت چٹھہ کی طرح بہت سے لوگوں کےضمیرجاگیں گے، الیکشن کے بعد جو دھاندلا ہوا سامنے آگیا، 60 سے 70ہزار برتری والے امیدوارکوہرایاگیا، جن کے ضمیر جاگیں گے، ان کا پی ٹی آئی سے کوئی رابطہ نہیں۔
رہنما پی ٹی آئی کا کہنا تھا کہ حکومت بنانا مشن امپاسیبل ہے لیکن ٹاسک پورا کریں گے، الیکشن لڑنا اور انتخابی مہم چلانا بھی ہمارے لیے مشن امپاسیبل بنا ہوا تھا تاہم مختلف جماعتوں سے رابطے ہیں، بات چیت چل رہی ہے ، کل یا پرسوں تک پارٹیوں سے بات چیت کا نتیجہ نکل آئے گا اور پی ٹی آئی کی پوزیشن کلیئرہوجائے گی۔
انھوں نے واضح بتایا کہ پیپلزپارٹی،ن لیگ اورایم کیوایم سے کوئی بات نہیں ہوگی ، ان تینوں پارٹیوں نے پی ٹی آئی کو دیوار سے لگایا، ہمارےکارکنوں پر جو ظلم ہوئے ان کو نہیں بھول سکتے۔
عمر ایوب نے دعویٰ کیا کہ پی ٹی آئی اسمبلی میں180 کا نمبر دکھائےگی، پی پی اور ن لیگ کے حکومت کے خواب پورےنہیں ہوں گے ، پی ٹی آئی حکومت بنائے گی،آپ دیکھتے رہیں۔
ان کا مزید کہنا تھا کہ جو چیزیں آج نظر آرہی ہیں وہ خود ریورس ہونا شروع ہوجائیں گی ، پی پی اور ن لیگ ایک دوسرے کی پیٹھ پر خنجرگھونپیں گے۔
