اسلام آباد : وزیراقتصادی امور عمر ایوب کی زیرصدارت اقتصادی رابطہ کمیٹی کے اجلاس میں 20 کروڑ ڈالر کی ویکسین خریداری کی منظوری دی جائے گی۔
تفصیلات کے مطابق وزیراقتصادی امور عمر ایوب کی زیرصدارت اقتصادی رابطہ کمیٹی کا اجلاس آج ہو گا ، جس میں7 نکاتی ایجنڈا زیرغور آئے گا۔
ذرائع کا کہنا ہے کہ اجلاس میں اے ڈی بی کی جانب سے 20 کروڑ ڈالر کی ویکسین خریداری کی منظوری دی جائےگی، ایشیائی ترقیاتی بینک نے 50 کروڑ ڈالر ویکسین خریداری کیلئے فراہم کیے تھے۔
اجلاس میں اسمال میڈیم انٹرپرائزز پالیسی2021سے2025 تک منظورکی جائےگی جبکہ یوریا کھاد کی درآمد کیلئے پیپرا رولز میں نرمی اور کابینہ ڈویژن کیلئے تکنیکی سپلیمنٹری گرانٹ کی منظوری دی جائے، کابینہ ڈویژن کی 10ارب کی گرانٹ پائیدارترقی کے اہداف کیلئے ہیں۔
ذرائع کے مطابق اجلاس میں وفاقی وزارت تعلیم کیلئے تکنیکی سپلیمنٹری گرانٹ کی منظوری دی جائےگی، 33کروڑ80 لاکھ کی گرانٹ قومی رحمت اللعالمین اتھارٹی کیلئے ہیں۔
