ڈیرہ اسماعیل خان : خیبر پختونخوا پولیس نے 28 اگست 2017 کو مندھراں کلاں اڈہ پر ہونے والی ڈکیتی کے معمے کو حل کر کے ایف آر پی (فرنٹئیر ریزرو پولیس ) کے کانسٹیبل سمیت تین ملزمان کو گرفتار کرلیا جب کہ ایک ملزم تاحال مفرور ہے۔
تفصیلات کے مطابق خیبر پختونخوا پولیس نے ڈکیتی میں ملوث تین ملزمان کو حراست میں لے لیا ہے جن میں سے ایک ملزم فرنٹیئر ریزرو پولیس کا ملازم ہے جب کہ ایک ملزم تاحال مفرور ہے جب کہ دس لاکھ روپے، موٹر سائیکل، تین موبائل اور دو پستول برآمد کرلیے گئے ہیں۔
ڈی پی او ڈیرہ راجہ عبد الصبور خان نے ایس پی انویسٹی گیشن حاجی ثناء اللہ خان، ایس پی محمد اشفاق، ڈی ایس پی ہیڈ کوارٹر ساجد ممتاز کے ہمراہ اپنے دفتر میں ہنگامی پریس کانفرنس کرتے ہوئے بتایا کہ 28 اگست 2017 کو تھانہ صدر کی حدود میں مندھراں کلاں اڈے پر ہونے والی 17 لاکھ روپے کی ڈکیتی کے مقدمے کے سلسلے میں ایس پی انویسٹی گیشن حاجی ثناء اللہ کی قیادت میں کیس کو ٹریس کرنے کے لیے ڈی ایس پی ہیڈ کوارٹر ساجد ممتاز اور ڈی ایس پی سٹی کی قیادت میں ٹیم تشکیل دی تھی۔
ڈی پی او راجہ عبدالصبور نے کہا کہ ٹیم نے انتھک محنت کے بعد صرف ایک ہفتے کی محنت کے دوران تکنیکی بنیادوں پر ایف آر پی کانسٹیبل ہدایت اللہ بلوچ ولد کاظم حسین سکنہ لاڑ، فتح اللہ بلوچ ولد شائستہ خان سکنہ لاڑ اور سلیمان کنڈی ولد عمر خان سکنہ گرہ کوڑہ ضلع ٹانک کو گرفتار کرلیا ہے جب کہ ایک ملزم نزاکت بلوچ ولد غلام صادق سکنہ جبار والا تاحال روپوش ہے۔
انہوں نے بتایا کہ پولیس نے گرفتار ملزمان سے 10 لاکھ روپے کی نقدی، تین موبائل سیٹ، ایک موٹر سائیکل اور دو پستول بھی برآمد کرلیے ہیں جس کے لیے پولیس نے انتھک محنت کی اور اس اندھی ڈکیتی کا سراغ لگا کر اچھی کارکردگی کا مظاہرہ کیا ہے۔
اس موقع پر انہوں نے مزید کہا کہ محرم الحرام کے حوالے سے ڈیرہ اسماعیل خان کو حساس ترین ضلع قرار دیا گیا ہے اور اس حوالے سے سیکورٹی کے تمام انتظامات مکمل ہیں اور مختلف مکاتب فکر سے تعلق رکھنے والے علماء رابطے میں ہیں جنہوں نے پولیس کو اپنے تعاون کی یقین دہانی کروائی ہے جب کہ بنوں ،مالا کنڈ اور مردانہ وغیرہ سے پولیس کی اضافہ نفری بھی ڈیرہ اسماعیل خان پہنچ رہی ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
