کراچی : ناگن چورنگی پر رینٹ اے کار دفتر میں تشدد سے نوجوان کے قتل میں ملوث ایک اور ملزم بلال صدیقی کو گرفتار کرلیا، پولیس کا کہنا ہے کہ ملزمان مفرور کی گرفتاری کی کوشش کی جا رہی ہے۔
تفصیلات کے مطابق کراچی ناگن چورنگی پر رینٹ اے کار دفتر میں تشدد سے نوجوان کے قتل کی تحقیقات جاری ہے، پولیس نے ایک اور ملزم بلال صدیقی کو گرفتار کرلیا۔
پولیس کا کہنا ہے کہ پولیس چار ملزمان کو پہلے ہی گرفتارکرچکی ہے ، گرفتار مرکزی ملزمان علی نواز اورمحمد عمارشوروم مالک ہیں۔
مقدمے میں نامزد حسان کو بھی حراست میں لے لیا گیا جبکہ سفیرسمیت کئی ملزمان مفرور ہیں جن کی گرفتاری کی کوشش کی جا رہی ہے۔
یاد رہے کراچی کے علاقے ناگن چورنگی کے قریب رینٹ اے کار کے دفتر میں ایک شخص پر بدترین تشدد کیا گیا تھا ، واقعہ کی ویڈیو سوشل میڈیا پر بھی وائرل ہوئی تھی۔
ویڈیو میں متعدد افراد ایک شخص کو برہنہ کرکے ڈنڈوں اور بیلٹ سے تشدد کررہے اور تشدد کے بعد ملزمان متاثرہ شخص کو دفتر میں بند کرکے چلے گئے تھے۔
بعد ازاں پولیس نے رینٹ اے کار کے دفتر میں نوجوان کے بہیمانہ قتل کا مقدمہ درج کیا تھا ،مقدمہ مقتول کی ہمشیرہ کی مدعیت میں درج کیا گیا تھا۔
مقتول کی بہن نے بتایا تھا کہ جس میں کہا گیا کہ اطلاع ملی میرے بھائی عدیل کی لاش رینٹ اےکار میں موجود ہے ، شوہر اور بہنوں کے ہمراہ پہنچی تو بھائی کی تشدد زدہ لاش موجود تھی، میرے بھائی پر بہیمانہ تشدد کیا گیا، ہاتھوں اور پیروں کی انگلیاں توڑ دی گئیں۔
