کروڑوں روپے کے آن لائن جوئے میں ملوث گروہ کے سرغنہ کو کراچی ایئرپورٹ پر امیگریشن حکام نے گرفتار کرلیا۔
تفصیلات کے مطابق کراچی ایئرپورٹ پر امیگریشن حکام نے کروڑوں روپے کے آن لائن جوئے میں ملوث گروہ کے سرغنہ کو گرفتار کرلیا گیا، ملزم رفیق امریکا فرار ہونے کی کوشش کررہا تھا۔
حکام نے بتایا کہ ملزم اور اسکے ساتھیوں پر ایف آئی اے اسٹیٹ بینک سرکل میں مقدمہ درج ہے، ملزمان کی جوئے سے حاصل کی گئی ستاسی کروڑ سے زائد رقم نجی بینک اکاؤنٹس میں موجودہے۔
حکام نے بتایا کہ ملزمان نےآن لائن گیمبلنگ کیلئے شہریوں سے ماہانہ کرائے پر شناختی کارڈ لے رکھے تھے، ملزمان کریڈٹ کارڈ ڈیٹا چوری کے ذریعے آن لائن خریداری میں بھی ملوث ہیں۔
حکام نے مزید بتایا کہ ملزم نے ایئرلائن کا ٹکٹ کریڈٹ کارڈ کے مسروقہ ڈیٹا کے ذریعے خریدا تھا، ملزمان نے جوئے کی رقم سے مختلف بینکوں میں اکاؤنٹس کھلوا رکھے تھے، جوئے کی رقم سے پوش علاقوں میں جائیدادیں بھی خریدی گئیں۔
