لاہور: پاکستان میں کھیلے جانے والے ایشیا کپ کے لیے ٹکٹس کی آن لائن فروخت کا آغاز ہو گیا ہے۔
پاکستان میں ایشیا کپ کے چار میچز کھیلے جائیں گے، ابتدائی طورپر صرف پاکستان میں کھیلے جانے والے میچز کے ٹکٹ دسیتاب ہیں، افتتاحی میچ 30 اگست کو ملتان اسٹیڈیم میں پاکستان اور نیپال کے درمیان کھیلا جائے گا۔
بک می ڈاٹ پی کے پر آن لائن ٹکٹس فروخت کے لیے پیش کر دیے گئے ہیں، سری لنکا، بنگلا دیش اور افغانستان کے درمیان میچز قذافی اسٹیڈیم لاہور میں کھیلے جائیں گے۔
پی سی بی اعلامیے میں کہا گیا ہے کہ ٹکٹس 14 اگست کو بھی عوام کو دستیاب ہوں گے، مہنگا ترین ٹکٹ 10 ہزار روپے کا رکھا گیا ہے، جب کہ 8500، 7000، 6000، 5000، 4000، 2500 اور 1500 روپے میں بھی ٹکٹس کی بکنگ کروائی جا سکتی ہے۔
دوسری جانب چیف سلیکٹر انضمام الحق نے گزشتہ دنوں ایشیا کپ کے لیے قومی ٹیم کا اعلان کیا ہے، جس میں دو سال بعد فہیم اشرف کی شمولیت ہوئی ہے اور عماد وسیم، شان مسعود کو ڈراپ کر دیا گیا ہے۔ کرکٹ شائقین سوال کر رہے ہیں کہ فہیم اشرف کو کون سی کارکردگی کی بنیاد پر ٹیم میں شامل کیا گیا ہے اور عماد وسیم، شان مسعود کو ڈراپ کرنے کی وجہ کیا ہے؟
واضح رہے کہ فہیم اشرف دو سال ون ڈے ٹیم سے دور رہے، اپریل میں ٹی 20 سیریز نیوزی لینڈ کے خلاف کھیلے، پانچ میچوں میں صرف ایک وکٹ لی اور بیٹنگ میں بھی خاطر خواہ کارکردگی نہ دکھا سکے تھے۔
