کویت سٹی: کویت میں ایک شہری کو آن لائن خریداری اس وقت بہت مہنگی پڑ گئی جب خریدے ہوئے موبائل کے ڈبے سے صرف ایک پرچی نکل آئی۔
تفصیلات کے مطابق کویت میں ایک شہری نے آن لائن شاپ سے موبائل خریدا تو پارسل سے موبائل کا خالی ڈبہ برآمد ہو گیا۔
سبق ویب سائٹ کے مطابق شہری کو موصول ہونے والے ڈبے میں ایک پرچی پڑی ہوئی تھی، شہری نے بتایا کہ جس کسی نے یہ بھیجا تھا اس نے پرچی میں معذرت کی تھی۔
رپورٹ میں کہا گیا ہے کہ کویتی شہری اپنی بیوی کو موبائل فون کا تحفہ دینا چاہتا تھا، اس کے لیے انھوں نے السالمیہ کی اوپن مارکیٹ سے آن لائن گلیکسی فون خریدا۔
جب چند دن کے بعد انھیں ایک ڈبا موصول ہوا تو کھولنے پر معلوم ہوا کہ وہ خالی ہے اور اندر ایک پرچی موجود ہے، جس پر لکھا تھا ’معذرت چاہتا ہوں، اس رقم کو ادھار سمجھیں، میرے والد بہت بیمار ہیں، چند دن بعد پیسے واپس کردوں گا۔‘
کویتی شہری کے مطابق انھوں نے آن لائن شاپ کو فون کرنے کی کوشش کی مگر وہاں سے کوئی جواب نہیں ملا۔
