کراچی کے علاقے اورنگی ٹاؤن کی فقیر کالونی میں کھلے عام منشیات فروشی جاری ہے جس کی فوٹیج اے آر وائی نیوز نے حاصل کرلی ہے۔
اے آر وائی نیوز کی اسکرین پر فوٹیج میں دیکھا جا سکتا ہے کہ اورنگی ٹاؤن کی فقیر کالونی میں ایک لڑکا نشے کے عادی افراد کو پیسے لے کر کھلے عام منشیات فراہم کر رہا ہے۔
کھلے عام منشیات فروشی سب کو نظر آ رہی ہے لیکن پولیس کی نظروں سے اوجھل ہے جس کے باعث علاقے میں منشیات کا استعمال بڑھ رہا ہے جس نے اہل علاقہ کو تشویش میں مبتلا کر دیا ہے۔
اہل علاقہ کا کہنا ہے کہ منشیات کے عادی افراد مومن آباد تھانے کی حدود میں لوٹ مار کی وارداتیں بھی کرتے ہیں اور اب تک ایسے متعدد واقعات رونما ہوچکے ہیں لیکن پولیس کے کانوں پر جوں نہیں رینگ رہی ہے۔
علاقے کے رہائشیوں کا کہنا ہے کہ پولیس اورنگی ٹاؤن سے منشیات فروشی کے خاتمے کے لیے موثر اقدامات کرے۔ منشیات فروشوں کیخلاف سخت کارروائی اور منشیات اڈے ختم کرکے علاقے سے اس ناسور کا خاتمہ اور آنے والی نسل کو تباہ ہونے سے بچایا جائے۔
