لاہور: جماعت اسلامی پاکستان نے عزم استحکام آپریشن کو مسترد کر دیا۔
تفصیلات کے مطابق امیر جماعتِ اسلامی پاکستان حافظ نعیم الرحمان نے ایک بیان میں کہا ہے کہ آپریشن عزم استحکام کے حکومتی فیصلے کو مسترد کرتے ہیں، پاکستان مزید کسی آپریشن کا متحمل نہیں ہو سکتا۔
حافظ نعیم الرحمان کا کہنا تھا کہ 2001 ایک سے پہلے قبائلی علاقوں، خیبر پختون خوا اور افغانستان سے ملحق سرحد محفوظ تھی، دو ہزار ایک سے شروع ہونے والے آپریشن کے نتیجے میں پاکستان کے حالات میں بگاڑ پیدا ہوا۔
انھوں نے کہا جماعت اسلامی کی واضح پوزیشن ہے فوجی آپریشن مسائل کا حل نہیں، 23 برس میں جتنے آپریشن ہوئے ان سے فائدے کی بجائے نقصان ہوا۔ حافظ نعیم کا کہنا تھا کہ افغانستان سے بامعنی مذاکرات کیے جائیں اور پاک ایران گیس پائپ لائن مکمل کی جائے، نوجوانوں کو روزگار اور تعلیم دی جائے۔
حافظ نعیم نے مزید کہا کہ ملک کو امریکا کی نام نہاد دہشت گردی کے خلاف جنگ میں دھکیلا گیا، جس میں ایک لاکھ پاکستانی سویلین اور سیکیورٹی اہلکار شہید ہوئے، مغربی سرحد غیر محفوظ ہوئی، قومی معیشت کو اربوں ڈالر کا نقصان ہوا، اور پاکستان بیرونی ایجنسیوں کا اکھاڑا بن گیا۔
