ملک بھر میں سیکیورٹی فورسز کی جرائم پیشہ افراد کے خلاف تابڑ توڑ کارروائیاں جاری ہیں۔ راولپنڈی، رحیم یار خان اور چنیوٹ سمیت کئی شہروں میں آپریشن کے دوران ملزمان کو گرفتار کیا گیا۔
تفصیلات کے مطابق آپریشن رد الفساد کے تحت سیکیورٹی فورسز نے ملک بھر میں دہشت گردوں کے خلاف گھیرا مزید تنگ کردیا۔
وفاقی دارالحکومت اسلام آباد میں سیکیورٹی اداروں نے گوہرہ مست، باغ جوئیاں و گرد و نواح میں آپریشن کر کے 4 مطلوب ملزمان سمیت 6 افراد کو گرفتار کرلیا۔
پولیس نے سرچ آپریشن کرتے ہوئے 180 گھروں کی تلاشی لی۔
پنجاب کے شہر ٹیکسلا میں رینجرز نے کارروائی کرتے ہوئے 3 افراد کو گرفتار کر کے بڑی تعداد میں اسلحہ برآمد کرلیا۔ راولپنڈی کے دیگر علاقوں میں آپریشن میں 5 ملزمان کو گرفتار کیا گیا۔ ملزمان میں بھتہ خور گروہ کا سرغنہ بھی شامل ہے۔
مزید پڑھیں: دہشت گردوں کے خلاف سیاسی و عسکری تعاون بڑھانے کا فیصلہ
رحیم یار خان میں رینجرز اور پولیس نے مشترکہ کارروائی کرتے ہوئے 15 ملزمان کو گرفتار کیا۔
لیاقت پور میں پولیس نے سرچ آپریشن کے دوران 8 مشکوک افراد کو گرفتار اور 170 کی بائیو میٹرک تصدیق کی۔
دریا خان کے نواحی علاقے ڈلے والا میں پولیس سرچ آپریشن کے دوران 15 افراد کو حراست میں لیا گیا۔ ملزمان سے اسلحہ و منشیات بھی برآمد ہوئی۔
میانوالی کے مختلف مقامات پر پولیس کے آپریشن میں گھروں اور خیمہ بستیوں کی تلاشی لی گئی۔ دوران آپریشن 93 مشکوک افراد کو حراست میں لیا۔
چنیوٹ میں پولیس حراست سے فرار دہشت گرد اپنے ہی ساتھیوں کی فائرنگ سے ہلاک ہوگیا۔ ہلاک ملزم کے سر کی قیمت مقرر تھی۔
