کراچی: اپوزیشن جماعتیں حکومت پر دباؤ کیلئے آج الیکشن کمیشن سے پی ٹی آئی فنڈنگ کیس کا فیصلہ جلد سنانے کا مطالبہ کریں گی۔
تفصیلات کے مطابق اپوزیشن جماعتوں نے حکومت پر دباؤ کیلئے ایک اور آپشن استعمال کرنے کا فیصلہ کرلیا ، اس سلسلے میں اپوزیشن رہنما آج الیکشن کمیشن سے پی ٹی آئی فنڈنگ کیس کا فیصلہ جلد سنانے کا مطالبہ کریں گے۔
ذرائع کا کہنا ہے کہ اپوزیشن جماعتیں پی پی ، ن لیگ و دیگر رہنما آج دوپہر ایک بجے الیکشن کمیشن پہنچ کر مطالبہ رکھیں گی۔
ذرائع کے مطابق رہنماؤں کی جانب سے الیکشن کمیشن کوپی ٹی آئی فارن فنڈنگ کیس فیصلہ فوری دینے کا مطالبہ کیا جائے گا۔
یاد رہے اپوزیشن نے وزیراعظم عمران خان کے خلاف تحریک عدم اعتماد جمع کرادی اور عدم اعتماد کی کامیابی کے لیے اپوزیشن جماعتوں کے رابطے بھی جاری ہے۔
خیال رہے پی ٹی آئی فنڈنگ کیس میں الیکشن کمیشن کو پیش اسکروٹنی کمیٹی کی رپورٹ کے اہم نکات سامنے آئے تھے، رپورٹ میں پی ٹی آئی نے 77 میں سے صرف 12 اکاؤنٹس ظاہر کیے جبکہ 53بینک اکاؤنٹس اور 31 کروڑ روپے کی رقم چھپائی۔
تحریک انصاف کے بیرون ملک سے فنڈز کی تفصیلات ، اسٹیٹ بینک کی جانب سےپی ٹی آئی بینک اکاونٹس ، امریکی ادارے فارا ایل ایل سی کی پی ٹی آئی اکاونٹس سے متعلق تفصیل اور پاکستان میں ڈالر آپریٹڈ اکاونٹس کی تفصیل بھی رپورٹ میں شامل ہیں۔
