اسلام آباد: قومی اسمبلی کے اجلاس میں آج بھی اپوزیشن نے غیر پارلیمانی رویہ اختیار کیا، جس کے باعث ایوان زیریں کا اجلاس غیر معینہ مدت تک ملتوی کردیا گیا ہے۔
تفصیلات کے مطابق قومی اسمبلی کا اجلاس ڈپٹی اسپیکر قاسم سوری کی زیر صدارت پارلیمنٹ ہاؤس میں ہوا، ایجنڈے کے مطابق آج کے اجلاس میں فرانسیسی سفیر کی ملک بدری معاملے پر بحث ہونی تھی تاہم اپوزیشن کی ہنگامہ آرائی کے باعث بحث نہ ہوسکی۔
قومی اسمبلی کے اجلاس کے آغاز میں ہی اپوزیشن اراکین اپنے نشستوں پر کھڑے ہوئے اور احتجاج شروع کردیا، اپوزیشن اراکین کا مطالبہ تھا کہ نکتہ اعتراض پر بولنے کی اجازت دی جائے، جس پر ڈپٹی اسپیکر نے احتجاج کرنے والے اراکین کو کہا کہ اجلاس رولز کے مطابق چلانے دیا جائے،وقفہ سوالات چل رہا ہے اس کے بعد موقع دوں گا۔
احتجاج کرنے والے اپوزیشن ارکان نے ڈپٹی اسپیکر کی ایک نہ سنی اور اسپیکر ڈائس کا گھیراؤ کرتے ہوئے شدید احتجاج کیا، احتجاج کے دوران اپوزیشن اراکین نے بینرز بھی اٹھارکھے تھے، جس پر مختلف نعرے درج تھے۔
اپوزیشن کا مطالبہ تھا کہ پہلے فرانس میں شائع گستاخانہ خاکوں سے متعلق قرارداد پر بات کرنے کی اجازت دی جائے، ڈپٹی اسپیکر نے اپوزیشن ارکان کے احتجاج کے پیش نظر قومی اسمبلی کا اجلاس غیر معینہ مدت کے لئے ملتوی کردیا۔
