The news is by your side.

Advertisement

مثبت سوچ کی حامل خواتین کی عمر لمبی

آپ زندگی کے مختلف معاملات کو کیسے دیکھتی ہیں؟ کیا آپ بقول محاورہ آدھا بھرا گلاس دیکھنے کی عادی ہیں؟ یا پھر آپ کو گلاس آدھا خالی نظر آتا ہے؟ اگر آپ گلاس کو آدھا خالی سمجھتی ہیں تو پھر آپ کو اپنے رویوں پر نظر ثانی کرنے کی ضرورت ہے کیونکہ یہ آپ کی جلد موت کا سبب بن سکتے ہیں۔

امریکی شہر بوسٹن میں کیے جانے والے ایک تحقیقی سروے سے ماہرین نے نتیجہ اخذ کیا کہ وہ خواتین جو زندگی کے تمام مسائل و معاملات میں پر امید رہتی ہیں اور مثبت سوچ رکھتی ہیں، وہ لمبی زندگی جیتی ہیں۔

ماہرین نے اس کے لیے 70 ہزار خواتین کا 8 سال کا ڈیٹا جمع کیا۔ نتائج سے انہیں معلوم ہوا کہ مثبت سوچ کی حامل خواتین میں کینسر، امراض قلب، فالج اور مختلف اقسام کے انفیکشن اور ان کے باعث موت کا خطرہ کم پایا گیا۔

woman-2

ریسرچ میں شامل ایک پروفیسر کیٹلین ہیگر کا کہنا ہے کہ زندگی کا روشن رخ دیکھنے والے مرد و خواتین اپنا طرز زندگی بھی مثبت اور صحت مندانہ رکھتے ہیں۔ وہ ورزش کرتے ہیں، نیند پوری کرتے ہیں اور متوازن غذائیں کھاتے ہیں۔

انہوں نے بتایا کہ پر امیدی اور مایوس نہ ہونے کی عادت ہمارے جسمانی نظام پر خوشگوار اثر ڈالتی ہے اور جسم کو مختلف بے قاعدگیوں میں مبتلا ہونے سے روکتی ہے۔

ماہرین نے تحقیقی نتائج کو مزید واضح کرتے ہوئے بتایا کہ مثبت سوچ کی حامل خواتین میں کینسر سے موت کا خطرہ 16 فیصد، امراض قلب سے 38 فیصد، فالج سے 39 فیصد اور کسی قسم کے انفیکشن کے باعث موت کا خطرہ 52 فیصد کم ہوتا ہے، بہ نسبت ان خواتین کے جو ناامید اور منفی سوچ رکھتی ہیں۔

woman-3

طبی ماہرین کا کہنا ہے کہ منفیت پرستی اور منفی سوچ گو کہ بیماریوں میں مبتلا نہیں کرتی لیکن یہ ہماری صحت پر برے اثرات ضرور مرتب کرتی ہے۔

ماہرین کے مطابق یہ ضروری ہے کہ ہم مثبت اختتام والی فلمیں اور ڈرامے دیکھیں، مثبت سوچ رکھنے والے افراد سے تعلق رکھیں اور ہر صورت حالات کا روشن رخ دیکھیں۔

Print Friendly, PDF & Email

Comments

comments

یہ بھی پڑھیں