کراچی : اورنگی ٹاؤن کے علاقے قصبہ کالونی میں گزشتہ روز ہونے والے مبینہ پولیس مقابلے میں 2 نوجوانوں کی ہلاکت کیخلاف لواحقین نے شدید احتجاج کیا۔
اے آر وائی نیوز کی رپورٹ کے مطابق نوجوانوں کے لواحقین اور علاقہ مکینوں کی بہت بڑی تعداد نے اورنگی ٹاؤن 5نمبر پر واقع ایس پی اورنگی کے دفتر کے باہر احتجاجی مظاہرہ کیا۔
مبینہ پولیس مقابلے میں ہلاک ہونے والے لڑکوں کے حوالے سے پولیس کا مؤقف ہے کہ ملزمان بلاول اور نقاش ڈکیتی کی نیت سے ایک گھر میں گھسے اور بعد ازاں مقابلے میں مارے گئے۔
دوسری جانب ہلاک ہونے والے بلاول کے کزن نے اے آر وائی نیوز سے گفتگو کرتے ہوئے کہا کہ وہ دونوں ڈاکو نہیں تھے ہم اس بات کی سختی سے تردید کرتے ہیں، وقوعہ کے روز بلاول کمپنی سے دوپہر کا کھانا کھانے گھر آیا تھا کہ اس دوران اس کا دوست ملنے آیا۔
کچھ دیر بعد اس کی کال آئی کہ وہ منگھوپیر تھانے میں ہے لیکن پھر اطلاع ملی کہ بلاول اور نقاش قصبہ کے علاقے میں پولیس مقابلے میں مارے گئے۔
اہل خانہ کا کہنا ہے کہ پولیس نے دونوں لڑکوں کو گرفتار کیا تھا، جنہیں بعد میں مبینہ مقابلے میں مار دیا گیا، اہلخانہ کے مطابق دونوں لڑکوں کے جسموں پر تشدد، جلانے اور چاقو کے وار کے نشانات ہیں۔
اہل خانہ کا مزید کہنا ہے کہ منگھوپیر پولیس نے نہ تو ان سے کوئی اسلحہ برآمد کیا اور نہ ہی ان کا کوئی کرمنل ریکارڈ ہے۔
اورنگی ٹاؤن نمبر 5 میں احتجاجی دھرنے کے باعث اطراف کی سڑکوں پر بدترین ٹریفک جام رہا، اہل خانہ اور مظاہرین نے وزیراعلیٰ سندھ سید مراد علی شاہ سے انصاف کی فراہمی کا مطالبہ کیا ہے۔
