کراچی: امن کا نوبل انعام دنیا کا سب سے بڑا اور معتبر ایوارڈ تصور کیا جاتا ہے، یہ ایوارڈ ان شخصیات، اداروں اور تنظیموں کو دیا جاتا ہے جنھوں نے تنازعات کے خاتمے، امن کے قیام اور اقوام کے درمیان تعلقات قائم کرنے کے لیے اپنا کردار ادا کیا ہو۔
یہ انعام اب تک (1901 سے 2020 تک) 107 افراد اور 23 تنظیموں کو دیا جا چکا ہے، بین الاقوامی ریڈ کراس کو تین مرتبہ امن کے نوبل انعام سے نوازا گیا جب کہ اقوام متحدہ کے ہائی کمشنر برائے مہاجرین کو 2 بار دیا گیا۔
رواں سال 2020 کا امن نوبل ایوارڈ ورلڈ فوڈ پروگرام (WFP) کو دیا گیا ہے، ڈبلیو ایف پی کو جنگ زدہ علاقوں میں بھوک مٹانے میں اہم کردار ادا کرنے پر نوبل امن انعام سے نوازا گیا۔
نوبل امن کا یہ ایوارڈ سابق امریکی صدور بارک اوباما اور جمی کارٹر کے علاوہ نیلسن منڈیلا، مارٹن لوتھر کنگ اور ملالہ یوسف زئی کو بھی دیا جا چکا ہے،اس کے علاوہ یہ باوقار ایوارڈ 23 تنظیموں کو بھی دیا گیا۔
امن کے نوبل پرائز کا اعلان کردیا گیا
جن تنظیموں کو یہ ایوارڈ دیا جا چکا ہے ان میں دنیا بھر کی اہم تنظیمیں شامل ہیں، جیسا کہ 2020 میں ورلڈ فوڈ پروگرام کو یہ ایوارڈ دیا گیا ہے، اس سے قبل 2017 میں انٹرنیشنل کیمپین ٹو ابالش نیوکلیئر ویپن نامی تنظیم کو یہ اعزاز دیا گیا، اور 2015 میں نیشنل ڈیلاگ کوارٹر جب کہ 2013 میں آرگنائزیشن فار دی پروہیبیشن آف کمیکل ویپن کو نوبل انعام دیا گیا۔
2012 میں یوروپین یونین، 2007 میں انٹرگورنمنٹل پینل آن کلائمنٹ چینج، 2006 میں گرامین بنک، 2005 میں انٹرنیشنل اٹامک انرجی ایجنسی، 2001 میں یونائٹیڈ نیشن، 1999 میں میڈیسنس سین فرنٹیریرس، 1997 میں انٹرنیشنل کیمپین ٹو بین لینڈ مائنس اور 1995 میں پگواش کانفرنس آن سائنس اینڈ ورلڈ افیئرز کو اس ایوارڈ سے نوازا گیا۔
1988 میں یونائٹیڈ نیشنس پیس کیپنگ فورس، 1985 میں انٹرنیشنل فزیشنز فار دی پریونٹ نیوکلیئر وار، 1954 اور 1981 میں آفس آف دی یونائٹیڈ نیشنز ہائی کمشنر فار رفیوجیز، 1977 میں ایمنسٹی انٹرنیشنل، 1969 انٹرنیشنل لیبر آرگنائزیشن، 1965 یونائٹیڈ نیشنز چلڈرنس فنڈ کو یہ اعزاز دیا گیا۔
جب کہ 1917، 1944 اور 1963 میں انٹرنیشنل کمیٹی آف دی ریڈ کراس کو یہ اعزاز حاصل ہوتا رہا، 1947 میں فرینڈ سروس کونسل، 1938 میں نانسن انٹرنیشنل آفس فار رفیوجیز، 1910 میں پرمیننٹ انٹرنیشنل پیس بیورو اور 1904 میں انسٹی ٹیوٹ آف انٹرنیشنل لا کو نوبل امن انعام دیا گیا۔
