کراچی : پاکستان کے ساتھ 36 ممالک کی کل سے شروع ہونے والی بحری امن مشقوں میں شرکت کیلئے غیر ملکی بحری جہازوں کی آمد شروع ہوگئے ہیں۔
تفصیلات کے مطابق پاکستان کے ساتھ 36 ممالک کی بحری امن مشقوں کا آغاز کل سے ہورہا ہے، جس میں ملکی تاریخ میں پہلی بار روس بھی شامل ہوگا، امن مشقیں 5 روز تک جاری رہے گی، بحری مشق امن میں شرکت کیلئے غیرملکی بحری جہازوں کی آمد شروع ہوگئی ہے۔
ترجمان پاک بحریہ کے مطابق روس اور سری لنکا کے بحری جہاز کراچی پورٹ پہنچ گئے ہیں ، چینی بحریہ کے 3جہاز کراچی پہنچ گئے ہیں جبکہ آسٹریلیا ، انڈونیشیا ، ترکی کے بحری جہاز بھی امن مشق میں شرکت کیلئے پہنچ گئے ہیں۔
امریکی بحریہ کے 3جہاز بھی بحری امن مشقوں کے لئے کراچی پہنچ رہے ہیں۔
مزید پڑھیں : پاکستان اپنا دفاع کرنے کی صلاحیت رکھتا ہے ‘ وائس ایڈ مرل عارف اللہ حسینی
گذشتہ روز کراچی میں میڈیا بریفنگ کے دوران کمانڈر پاکستان فلیٹ وائس ایڈمرل عارف اللہ حسینی نے کہا ہے کہ 5 روزہ بحری امن مشقوں میں چین، امریکہ، سعودی عرب اور ایران سمیت 36 سے زائد ممالک شرکت کریں گے اور ان مشقوں میں پہلی بار روس کا بحری بیڑا اور فورس بھی شریک ہوگی، بحری مشقوں کے دوران عالمی میری ٹائم کانفرنس بھی ہوگی۔ جس میں شرکت کے لئے 70 سے زائد ممالک کے مندوبین کو دعوت دی گئی ہے۔
وائس ایڈمرل عارف اللہ حسینی نے کہا کہ بحری امن مشقیں کسی ملک کے خلاف نہیں بلکہ اس کا مقصد ضرورت پڑنے پر ایک دوسرے کی مدد کرنا ہے۔
انہوں نے کہا کہ بھارت کا عمل ہمیشہ سے پاکستان کے خلاف جارحانہ رہا ہے لیکن ہم ایک مضبوط قوم ہیں اور سمندر پر حاوی بھی۔ اگر بھارت ہماری سمندری حدود میں جارحانہ عزائم لے کر آئے گا تو بچ کر نہیں جاسکتا۔
