کراچی: صوبائی وزیر صنعت نے اووربلنگ کی شکایت پر صنعت کاروں کے لیے کمیٹی بنانے کا اعلان کیا ہے۔
تفصیلات کے مطابق سندھ کے صوبائی وزیر صنعت جام اکرام اللہ دھاریجو نے کہا ہے کہ صنعت کاروں کی جانب سے اوور بلنگ کی شکایات مل رہی ہیں، جس کے لیے ایف پی سی سی آئی کے قائمقام صدر ثاقب فیاض مگوں کے ساتھ مل کر معاملہ حل کرنے کے لیے کمیٹی بنا رہے ہیں۔
صوبائی وزیر نے کہا اووربلنگ پر کے الیکٹرک حکام سے بات کروں گا، بجلی بلوں کی ادائیگی اب ہر کسی کے لیے مسئلہ بن گئی ہے۔
جام اکرام اللہ دھاریجو کا کہنا تھا کہ وہ سندھ کے صنعتی مسائل اور منصوبوں میں تاخیر پر اگلے ہفتے اسلام آباد جا رہے ہیں، اور ایف پی سی سی آئی کا بھی ایک نمائندہ ان کے ساتھ جائے گا۔
سابق نگراں وزیر تجارت نے بجلی بل کم کرنے کی تجاویز پیش کر دیں
خیال رہے کہ اس وقت تمام صنعت کار، تمام چیمبر آف کامرس اور چھوٹی بڑی صنعتوں کے مالکان یہ دہائی دے رہے ہیں کہ جتنی مہنگی بجلی انھیں دی جا رہی ہے اُس میں وہ پروڈکشن نہیں کر سکتے، کیوں کہ لاگت اتنی زیادہ ہو جاتی ہے کہ عالمی منڈی میں مقابلہ ہی نہیں کیا جا سکتا۔ دوسری طرف حال ہی میں پاکستان میں انکشاف ہوا ہے کہ آئی پی پیز کو بجلی کی پیداوار نہ کرنے پر بھی حکومت پاکستان سالانہ طور پر اربوں روپے کے کیپسٹی چارجز دے رہی ہے اور یہ سارا بوجھ غریب عوام اور صنعت کاروں پر ڈالا جا رہا ہے۔
