کینیڈا میں بھی اوور سیز پاکستانیوں نے شہید صحافت ارشد شریف کے قتل کے خلاف احتجاجی ریلی نکالی اور قاتلوں کو کیفر کردار تک پہنچانے کا مطالبہ کیا۔
اے آر وائی نیوز کے مطابق شہید صحافت ارشد شریف کے قتل کے خلاف اوور سیز پاکستانی کینیڈا میں بھی سڑکوں پر آگئے اور احتجاجی ریلی نکالی جس میں تحریک انصاف کینیڈا کے عہدیداروں وکارکنوں کی بڑی تعداد نے شرکت کی اور شہید ارشد شریف سے اظہار یکجہتی کیا۔
مظاہرین کا کہنا تھا کہ ارشد شریف نے ہمیشہ سچ اور حق عوام تک پہنچایا، ان کا قتل صحافت کی دنیا میں ناقابل تلافی نقصان ہے، ان کے نڈر اور بے باک صحافتی کردار کو ہمیشہ یاد رکھا جائے گا۔
مظاہرین نے مطالبہ کیا کہ ارشد شریف شہید کے قتل کی غیر جانبدارانہ اور شفاف تحقیقات کرائی جائیں اور قاتلوں کو کیفر کردار تک پہنچایا جائے۔
شہید ارشد شریف کے ایصال ثواب کے لیے مسی ساگا میں فاتحہ خوانی بھی کی گئی۔
