اسلام آباد : اوورسیز پاکستانیز فاؤنڈیشن تاریخ میں پہلی بار منافع بخش ادارہ بن گیا، فاؤنڈیشن نےگزشتہ سال19-2018 میں111 ملین کی بچت کی ، او پی ایف کے قیام کی50 ویں سالگرہ پرمنافع بخش ادارہ بننا تاریخ ہے۔
تفصیلات کے مطابق وزیراعظم عمران خان کی ادارہ جاتی اصلاحات کےمثبت نتائج سامنےآنےلگے، وزارت سمندر پار پاکستانیوں ، ترقی انسانی وسائل کو بڑی کامیابی مل گئی ، اوورسیزپاکستانیز فاؤنڈیشن تاریخ میں پہلی بار منافع بخش ادارہ بن گیا۔
فاؤنڈیشن نےگزشتہ سال 19-2018 میں 111ملین کی بچت کی ، فاؤنڈیشن کی آمدنی2 ہزار 815 ملین اور اخراجات 2 ہزار 704ملین رہے ، او پی ایف گزشتہ 4 سال مسلسل شدید مالی بحران کا شکار رہا ، او پی ایف کے قیام کی50 ویں سالگرہ پر منافع بخش ادارہ بننا تاریخ ہے۔
وزیراعظم نے سمندر پار پاکستانیوں کے امور پر خصوصی ہدایات دیں ، سمندر پار پاکستانیز، ترقی انسانی وسائل کے مشیر زوالفقاربخاری نےاقدامات کیے، فاؤنڈیشن کے زیرنگرانی خسارے والے منصوبوں میں بہتری لائی گئی، ادارے میں کرپشن، غیرضروری اخراجات پرقابو اور کفایت شعاری کو اپنایاگیا۔
وزیراعظم نے اداروں کو مستحکم اور وقار بلند کرنے کی واضح ہدایات دیں اور وزیراعظم کی ہدایات پر ہی ازسرنو ڈھانچہ سازی، اصلاحات کا اطلاق کیاگیا۔
اوورسیزپاکستانیز فاؤنڈیشن کو رواں سال کے آغاز پر آئی ایس او 9001سند سے نوازاگیا، فاؤنڈیشن آئی ایس او 9001سند کے بعدعالمی معیار کا ادارہ بن گیا ہے۔
وزیراعظم نے پاکستان کو سیاحوں کیلئے پر کشش ملک بنانے کا وعدہ کیاتھا اور سیاحتی مقامات کھولنے، ہر ممکن سہولتوں کی فراہمی کا کہا تھا، عمران خان کی ہدایات کی روشنی میں ہی نئی ویزہ پالیسی کا اجرا ہوا ، جس سے غیر ملکیوں کیلئے ویزہ حصول سہل، بیرون ملک مقیم کے وقار میں اضافہ ہوا۔
