اسلام آباد: اوور سیز پاکستانیوں کے لیے زبردست خوشخبری ہے کہ بیرون ملک سے جاری شدہ ڈرائیونگ لائسنس پاکستان میں تسلیم کیے جائیں گے۔
سمند پار پاکستانیوں کی مشکلات کم کرنے اور انہیں سہولیات فراہم کرنے کی پالیسی پر گامزن رہتے ہوئے حکومت نے ایک اور اہم اقدام اٹھایا ہے۔
بیرون ملک سے جاری شدہ ڈرائیونگ لائسنس کو پاکستان میں تسلیم کرنے کا فیصلہ کیا گیا ہے، بیرون ملک سے جاری ہوئے مؤثر لائسنس اسلام آباد میں استعمال ہوسکیں گے۔
اس حوالے سے ٹریفک اہلکاروں کو ہدایات کے ساتھ سرکلر جاری کر دیا گیا ہے جس میں غیر ملکی ڈرائیونگ لائسنس کے حامل شخص کو گاڑی چلانے کی اجازت دی گئی ہے۔
واضح رہے کہ وزیراعظم کے معاون خصوصی برائے سمندر پار پاکستانی زلفی بخاری سے آن لائن سیشن میں کئی بار غیر ملکی ڈرائیونگ لائسنس کے حوالے سے سوالات کیے گئے تھے اور بار بار اس معاملے کو اٹھایا گیا تھا۔
اوورز سیز پاکستانیوں نے سفری سہولیات کے ساتھ ساتھ غیرملکی ڈرائیونگ لائسنس کو تسلیم کرنے کا مطالبہ کیا تھا جسے اب حکومت نے پورا کر دیا ہے۔
