کراچی : کرونا وائرس سے بچاؤ کیلئے حکومتی احکامات کی خلاف ورزی پر نوابشاہ پولیس نے ایکشن لیتے ہوئے شادی ہال کے مالک کو گرفتار کرلیا، شکارپور میں تقریبات کا سلسلہ جاری ہے۔
تفصیلات کے مطابق سندھ حکومت کی جانب سے کرونا وائرس کے خدشے کے باعث لگائی جانے والی پابندی کی خلاف ورزی پر انتظامیہ ایکشن میں آگئی۔
نوابشاہ پولیس نے شادی ہالز میں تقریبات کی بندش کی خلاف ورزی پر سکرنڈ روڈ پر قائم شادی ہال میں جاری ایک تقریب پر چھاپہ مارا، اس موقع پر مالک کو حراست میں لے کر تھانے منتقل کردیا گیا۔
شادی ہال چھاپے کے دوران تقریب میں شریک افراد میں بھگدڑ مچ گئی، پولیس نے چھاپہ مار کارروائی کے دوران شادی ہال سیل کردیا۔
اس کے علاوہ شکارپور میں تقریبات اور عوامی اجتماعات پر پابندی کے باوجود تقاریب کا سلسلہ جاری ہے۔
اتوار کے روز بھی شہر کے مختلف شادی ہالز میں تقریبات منعقد کی جارہی ہیں، کورونا وائرس کے سبب حکومت نے تقریبات اور عوامی اجتماعات پر پابندی لگائی ہے۔
ضلع انتظامیہ حکومت کے واضح احکامات کے باوجود تقریبات سے لاعلم ہے، اس کے علاوہ شکارپور میں مختلف ہوٹلوں پر بھی معمول کے مطابق رش دیکھنے میں آرہا ہے۔
