لندن: آکسفورڈ یونیورسٹی کے چانسلر کا انتخاب یونیورسٹی انتظامیہ کے لیے درد سر بن گیا ہے۔
برطانوی میڈیا کے مطابق آکسفورڈ یونیورسٹی میں چانسلر کے انتخاب کا معاملہ پیچیدہ ہو گیا ہے، جس کی وجہ پاکستان کے سابق وزیر اعظم اور پی ٹی آئی کے بانی ہیں، جو ان دنوں پاکستان کی جیل میں ہیں۔
رواں ہفتے انتخاب میں شریک شخصیات کی حتمی فہرست کا اعلان ہونا ہے، لیکن تاحال یہ طے نہیں ہو پایا کہ بانی پی ٹی آئی بھی امیدوار بننے کا قانونی جواز رکھتے ہیں یا نہیں۔
یونیورسٹی کے طے شدہ بنیادی شرائط کے مطابق امیدوار کو یونیورسٹی کا فارغ التحصیل ہونے کے ساتھ ساتھ نہ تو یونیورسٹی کا ملازم ہونا چاہیے، اور نہ ہی کسی چیریٹی تنظیم کے فراڈ کا ثابت شدہ مجرم ہونا چاہیے، لیکن اگر تفصیل میں جایا جائے تو یہ بھی دیکھنا ہوگا کہ امیدوار غیر قانونی سرگرمیوں کی وجہ سے سزا یافتہ تو نہیں ہے یا پھر وہ گزشتہ دو سال میں کسی حکومتی عہدے پر رہ چکا ہے۔
یونیورسٹی الیکشن کمیشن ان تمام نکات کو دیکھنے اور پرکھنے کے لیے اب قانونی رائے لے رہی ہے، جس کے بعد آئندہ چند روز میں اعلان ہوگا کہ کون کون سے امیدوار آکسفورڈ یونیورسٹی کے چانسلر انتخابات میں حصہ لے پائیں گے۔
