پرواز کے دوران طیارے کے مسافروں کی حالت اس وقت ڈر کے مارے خراب ہوگئی جب اچانک لوگوں کے سامنے آکسیجن ماسک آگرے۔
انٹرنیٹ پر ایک ویڈیو کلپ زیرگردش ہے جس میں ایئر فرانس کے طیارے کو پریشر سسٹم میں خرابی کی وجہ سے ہنگامی لینڈنگ کرنا پڑی، اس صورتحال میں مسافروں کے اوپر اچانک آکسیجن ماسک گرتے ہوئے دیکھا جا سکتا ہے۔
طیارے کی ہنگامی لینڈنگ کے دوران جہاز کے اندر ہنگامی طریقہ کار کو فعال کیا گیا اور آکسیجن ماسک مسافروں کے سامنے گرا جس کے بعد خوف و ہراس پھیل گیا۔
ہنگامی حالت کے اعلان کے وقت ایئربس اے 318 طیارہ پیرس چارلس ڈی گال ایئرپورٹ سے بارسلونا جا رہا تھا، پائلٹ کو ٹیک آف کے 17 منٹ بعد لینڈ کرنا پڑا۔
آکسیجن ماسک گرانا ہنگامی لینڈنگ کے طریقہ کار کا حصہ ہے، ایئر فرانس کے عملے کو اس قسم کی صورتحال کو مینوفیکچرر کے طریقہ کار کے مطابق سنبھالنے کے لیے باقاعدگی سے تربیت دی جاتی ہے۔
خیال رہے کہ دباؤ میں کمی کی صورت میں آکسیجن ماسک خود کار طریقے سے مسافروں کے سامنے آجاتے ہیں تاکہ جہاز میں سوار افراد کو سانس لینے کی سہولت دی جا سکے۔
