کراچی: پاکستان میں تیزی سے مقبول ہونے والے کھیل پیڈل میں پہلی بار انٹرنیشنل ایونٹ میں پاکستانی کھلاڑی ملک کی نمائندگی کریں گے، پاکستان کے محمد عزیز خان ایف آئی پی انٹرنیشنل برونز ایونٹ میں ایکشن میں نظر آئیں گے۔
پاکستان سے پیڈل کے کھلاڑی محمد عزیز خان ایف آئی پی انٹرنیشنل ایونٹ میں باضابطہ طور پر پاکستان کی نمائندگی کرنے والے پہلے پاکستانی کھلاڑی بن گئے ہیں، اس بات کا اعلان گزشتہ روز پاکستان پیڈل فیڈریشن (پی پی ایف) کے صدر محمد متین نے کیا۔
ایف آئی پی انٹرنیشنل برونز ٹورنامنٹ 2025 ہانگ کانگ میں 10 سے 16 مارچ تک کھیلا جائے گا، انٹرنیشنل پیڈل فیڈریشن (ایف آئی پی) نے باضابطہ طور پر شرکا کی فہرست اپنی ویب سائٹ پر شائع کر دی ہے، جس میں بیلجیم سے محمد عزیز خان کے ساتھی سیبسٹین گارسیا اورٹیگا کے ساتھ شرکت کی تصدیق کی گئی ہے۔
پی پی ایف کے صدر کے مطابق عزیز خان اس وقت ہانگ کانگ میں ایونٹ کی تیاری کے سلسلے میں اپنی پریکٹس میں مصروف ہیں، وہ ایک غیر ملکی کوچ کی نگرانی میں سخت تربیت حاصل کر رہے ہیں۔
محمد عزیز خان کا بین الاقوامی سطح پر سفر پاکستان پیڈل فیڈریشن کی جانب سے نیشنل پیڈل لائسنس کے اجرا کے ذریعے ممکن ہوا، جس کے بعد انٹرنیشنل پیڈل فیڈریشن کی جانب سے بین الاقوامی لائسنس کی منظوری سے عالمی مقابلوں میں ان کی شرکت کی راہ ہموار ہوئی۔
محمد متین نے کہا کہ پی پی ایف گراس روٹ سطح سے لے کر بین الاقوامی میدان تک پیڈل کی ترقی اور فروغ کے لیے وقف ہے، پاکستانی پیڈل ٹیم کے کھلاڑیوں کو ایشین پیڈل چیمپئن شپ 2025 میں بھی بھیجنے کی تیاری کی جا رہی ہے، جو روواں سال اکتوبر میں سعودی عرب میں منعقد ہوگی۔
