اسلام آباد: پاک فضائیہ کے بیڑے میں جدید لڑاکا طیارہ جے ٹین سی شامل کرلیا گیا، اس موقع پر فلائی پاسٹ کا شاندار مظاہرہ بھی کیا گیا، جے ٹین سی طیارہ فضا سے زمین اورسمندر میں ٹارگٹ کرنے کی صلاحیت رکھتا ہے۔
تفصیلات کے مطابق اسلام آباد میں کامرہ ایئربیس پر پاک فضائیہ میں لڑاکا طیارے جے ٹین سی کی شمولیت کی شاندار تقریب کا انعقاد کیا گیا ، وزیراعظم عمران خان نے تقریب میں بطور مہمان خصوصی شرکت کی۔
پاک فضائیہ کے سربراہ نے وزیراعظم عمران خان کا استقبال کیا، تقریب میں وفاقی وزرا اور مسلح افواج کے سربراہان سمیت پاکستان میں چین کے سفیر بھی شریک تھے۔
We welcome ‘Vigorous Dragon’ to the PAF
Induction ceremony of the Chengdu J10-C a multi role fighter aircraft into the #Pakistan Air Force (PAF) at 11am today.@DGPR_PAF @OfficialDGISPR #PAF #China #ISPR pic.twitter.com/f3rcXANoUX
— Pakistan Armed Forces 🇵🇰 (@PakistanFauj) March 11, 2022
اس موقع پر مہمان خصوصی وزیراعظم عمران خان کو گارڈ آف آنر بھی پیش کیا گیا، جس کے بعد لڑاکا طیاروں میراج ،جے ایف سولہ اور جے ایف سترہ نے فلائی پاسٹ کاشاندارمظاہرہ کیا، شیردل طیاروں نے شاندار فورمیشن سے سبزہلالی پرچم کے رنگ آسمان پربکھیرے۔
تقریب میں چینی ساختہ لڑاکا طیارے جےٹین سی کی گرجدار آمد سے حاضرین دنگ رہ گئے، جے ٹین سی طیارہ فضا سے زمین اورسمندر میں ٹارگٹ کرنے کی صلاحیت رکھتا ہے اور اسے ‘ویگرس ڈریگن’ بھی کہا جاتا ہے۔
جدید فائٹر ایئرکرافٹ جے ٹین سی بحری جہاز تباہ کرنے والے مؤثر میزائلوں سے لیس ہے اور بھارتی رفال طیاروں کا مقابلہ کرنے کی بھرپور صلاحیت رکھتا ہے۔
دوسری جانب پاک فضائیہ کے شعبہ تعلقات عامہ نے فضائی بیڑے میں جے۔10 سی جہازوں کی شمولیت کی مناسبت سے ملی نغمہ جاری کردی ہے ، جس میں پاک فضائیہ کے بہادر شاہینوں کو خراج تحسین پیش کیا گیا ہے، جو دفاع وطن کے لیے ہمہ وقت چوکس و تیار ہیں۔
نغمے میں اس امر کو بھی اجاگر کیا گیا ہے کہ پاک فضائیہ اپنی آپریشنل صلاحیتوں میں مزید اضافے کے لئے جدت اور خودانحصاری کی جانب گامزن ہے۔
مزید برآں ملی نغمے میں اس عہد کی بھی تجدید کی گئی ہے کہ پاک فضائیہ کا ہر جوان ارض پاک کی ناموس کی حفاظت کے لیے کسی بھی قربانی سے دریغ نہیں کرے گی۔
