اسلام آباد : پاک فضائیہ نے جنگ ستمبر کے ہیرو ایم ایم عالم کے یوم ولادت پر خراج عقیدت پیش کرتے ہوئے دستاویزی فلم جاری کردی، ایم ایم عالم پاک فضائیہ کے فائٹر پائلٹس کے لئے ایک رول ماڈل کی حیثیت رکھتے ہیں اور ہمیشہ ہمارے دلوں میں زندہ رہیں گے۔
تفصیلات کے مطابق پاکستان کے بہادر سپوت اور جنگ ستمبر کے ہیرو ایم ایم عالم کو خراج عقیدت پیش کرنے کے لئے پاک فضائیہ کے شعبہ تعلقات عامہ نے ان کے یوم ولادت پر ایک مختصر دستاویزی فلم نشر کر دی۔
پاکستان کے بہادر سپوت اور جنگ ستمبر کے ہیرو محمد محمود عالم 6 جولائی 1935 کو کلکتہ میں پیدا ہوئے، محمد محمود عالم کا خاندان قیام پاکستان کے وقت مشرقی پاکستان منتقل ہو گیا تھا، ملکی سرحدوں کی حفاظت کے جذبے سے سر شار عالم نے 1953ء میں پاک فضائیہ میں کمیشن حاصل کیا۔
Today marks the 85th Birth anniversary of Legendary Air Commodore Muhammad Mehmood Alam.#PakistanAirForce #PAF #Pakistan #FighterAce #MMAlam pic.twitter.com/S4FzvkPEyN
— PAF Falcons (@PAF_Falcons) July 6, 2020
جنگ ستمبر میں سکواڈرن لیڈر عالم دشمن کے لیے پیام اجل ثابت ہوئے، انہوں نے 7ستمبر 1965ء کو ایک مشن کے دوران پانچ بھارتی جہاز گرا کر ایک نا قابل فراموش کارنامہ سر انجام دیا، انہوں نے اس جنگ میں مجموعی طور پر بھارت کے نو طیارے تباہ کئے اور دو کو جزوی نقصان پہنچایا۔
ان کی بہادری کے اعتراف میں حکومت پاکستان نے انہیں دو مرتبہ ستارہ جرآت سے نوازا، ایم ایم عالم کا شمار ان غازیوں میں ہوتا ہے، جنہوں نے پاک فضائیہ کو دشمن پر واضح برتری دلوائی اور قومی پرچم کو سربلند رکھا۔
ایم ایم عالم پاک فضائیہ کے فائٹر پائلٹس کے لئے ایک رول ماڈل کی حیثیت رکھتے ہیں اور ہمیشہ ہمارے دلوں میں زندہ رہیں گے۔
