اسلام آباد : پاکستان میں ایران کے سفیر ڈاکٹر رضا امیری کا کہنا ہے کہ ایران اسرائیل کے ساتھ طویل جنگ کے لیے تیار ہے، جس مقام سے ہم پرحملہ ہوگا ہم اسی جگہ پر جواب دیں گے۔

تفصیلات کے مطابق پاکستان میں ایران کے سفیر ڈاکٹر رضا امیری نے اے آر وائی نیوز کو اہم انٹرویو میں کہا کہ جب تک جارحیت ہوگی ہمارے پاس بھی دفاع کے سوا کوئی راستہ نہیں جو ہم کریں گے۔

ڈاکٹر رضا نے بتایا کہ بھارت نے اسرائیلی جارحیت کی مذمت نہیں کی ہے، بھارت نے کچھ رابطے ضرور کئےہیں لیکن واضح طور پر مذمت نہیں کی، دوستوں کا شکریہ ادا کرتےہیں جنہوں نےایران کی سیکیورٹی کونسل میں بھی حمایت کی، تمام ہمسایہ ممالک خاص طور پر پاکستانی حکومت نے اسرائیلی جارحیت کی مذمت کی، پاکستانی عوام اور میڈیا نے بھی اچھی کوریج دے کر ایران کی حمایت کی۔

ایرانی سفیر کا کہنا تھا کہ جس مقام سےہم پرحملہ ہوگا ہم اسی جگہ پر جواب دیں گے، علاقائی ممالک میں سے ابھی تک امریکی اڈوں سے ایران پر حملے نہیں کئے گئے اور جن ممالک میں امریکی اڈے ہیں وہاں کی حکومتوں نے اسرائیل کی مذمت کی ہے، علاقائی ممالک سے رابطہ ہے اور امید ہے وہ اپنی سرزمین ایران کیخلاف استعمال نہیں ہونے دیں گے۔

انھوں نے کہا کہ امریکا اس جارحیت میں شریک ہے اور ہم کسی سے ڈکٹیشن نہیں لیں گے، 40سال سے زائد ہوگئے جوبھی امریکی صدر آتا ہے وہ بےتکی باتیں کرتا ہے،  15جون کوامریکا سےبات چیت طے تھی لیکن دو روز پہلے دہشت گردی کردی ، ہمارے جو کمانڈرز آرام کررہے تھے اور فوجی وردی میں نہ تھےان پر حملہ بزدلانہ اقدام تھا۔

ڈاکٹر رضا امیری کا کہنا تھا کہ جنگ میں نشیب وفراز آتےہیں اورجب اختتام ہوگاتودیکھیں کون جیتتا ہے، حق ہمیشہ تنہا ہوتاہے، ایران کی پالیسی ہےکہ وہ نہ شرقی ہے ناغربی بلکہ ہم مستقل ہیں۔

ایرانی سفیر نے کہا کہ صیہونی حکومت ابھی تک جارحیت جاری رکھےہوئےہے،ان کونقصان بھی اٹھانا پڑا، صیہونی ملک میں عدم تحفظ کااحساس ہے، ہر رات کو ان کے شہروں پرمیزائل حملےہورہےہیں، ان کے بڑے دعووں کے باوجود ہمارے میزائل ان کو لگ رہےہیں ،نقصان بھی ہورہاہے لیکن ابھی تک اس جنگ کو بندکرنے کیلئے کوئی سنجیدہ کوشش کسی طرف سےنہیں ہوئی۔

ان کا مزید کہنا تھا کہ جب یہ دیکھیں گےاسرائیل کو شکست ہورہی ہے تو یہ سب صلح کیلئے سامنے آجائیں گے، ہم نےکبھی مذاکرات کی میز کو ترک نہیں کیا لیکن ایسے حملوں کے بعد کیسے مذاکرات۔

انھوں نے کہا کہ صیہونی حکومت کی تاریخ ہے وہ ایسی جنگ شروع کریں کہ شکست نہ ہو اور تھوڑےعرصے کے لیے ہو، نیتن یاہو نےبھی کہا کہ اس نے ٹرمپ کےساتھ رابطےمیں رہ کریہ جارحیت کی، صیہونی حکومت کی سب سےبڑی جنگ حماس کیخلاف ہوئی جواسلام پسندوں کی وجہ سےجاری ہے،صیہونی حکومت ایسے پاگل شخص کی طرح ہوگئی ہے جو ہر کسی کو کاٹنے کو دوڑ رہا ہے۔

ایرانی سفیر نے بتایا کہ ہم کبھی شارٹ مدت کی کشیدگی میں نہیں گئے ، ایران کیخلاف جارحیت کا فیصلہ بھی اسی طرح ہوگا، اسرائیل نےجن علاقوں پر قبضہ کیا وہ محدود ہیں جبکہ ایران ایک براعظم کا نام ہے، اسرائیل ایران کی کتنی جگہوں پر حملہ کرلے گا۔

ڈاکٹر رضا امیری کا کہنا تھا کہ اسرائیل کےلوگ بنکرز میں کتوں کیساتھ رہ رہے ہیں جس کی تصویریں بھی ہیں، ابھی تک نیتن یاہو صرف ایک بار اپنے بنکر سے باہر نکلاہے اور دوسری طرف ایران میں لوگ چھتوں پر چڑھ کر دیکھ رہے ہوتےہیں۔

انھوں نے مزید کہا کہ صدام نے جب امریکی سپورٹ سےجنگ کی توہمارے پاس کلاشنکوف کی گولیاں نہ تھیں، آج ہمارے میزائل ہر رات اسرائیل کو جنجھوڑ رہےہیں، جنگ شروع کرنے کا اختیار اسرائیل کے پاس تھا لیکن اختتام اس کےپاس نہیں۔

حملے سے متعلق سوال پر ایرانی سفیر کا کہنا تھا کہ یہ سوال دوسروں کی طرح ہمارے لیے بھی ہے کہ صیہونی حکومت نےکس بنیادپراقدام اٹھایا، صیہونی حکومت نےبہت سےبےگناہ لوگوں کو جارحیت سے شہید کیا، صیہونیوں کی جارحیت کی اصل وجہ کچھ اور ہے ایٹمی مسئلےکابہانہ بنایا گیا، ہمارے ایٹمی پروگرام کی سب سےزیادہ مانیٹرنگ ہوئی ، آئی اےای اے نے15بار پرامن ہونےکی تصدیق کی اور امریکی انٹیلی جنس نے ایرانی ایٹمی پروگرام کوپرامن قرار دیا ہوا ہے۔

انھوں نے بتایا کہ ہمارے سپریم لیڈر نے ایٹمی ہتھیاروں کو ممنوع اور حرام ہونےکا فتویٰ جاری کیا ہوا ہے ، کسی قسم کا جواز ان کے پاس نہیں تھا سوائے ہم فلسطین کاز کی حمایت کرتےہیں، ہمارے ملک پر جارحیت کی گئی ہےاور ہم اپنا دفاع کررہےہیں، جس نے جارحیت کو شروع کیا اوراسکےحمایتی امریکاسےپوچھنا چاہیےیہ کب تک ہوگی، امریکی غاصب حکومت اسرائیل کو اسلحہ اورحمایت دےرہاہےجس کےدستاویزی ثبوت ہیں۔

اسلام آباد : بجٹ میں سولر پینل پر 18 فیصد سیلز ٹیکس عائد کرنے کی تجویز مسترد کردی گئی ، جس پر چیئرمین ایف بی آر نے بتایا کہ سولر پینل پورا بنایا ہوا امپورٹ کیا جائے تو اس پر سیلز ٹیکس نہیں۔

تفصیلات کے مطابق سید نوید قمر کی زیر صدارت قومی اسمبلی کی قائمہ کمیٹی خزانہ کا اجلاس ہوا، جس میں بجٹ میں سولر پینل پر 18 فیصد سیلز ٹیکس عائد کرنے کی تجویز مسترد کردی گئی۔

چیئرمین ایف بی آر نے بتایا کہ سولر پینلز کے فوٹو وولٹیک سیلز کے اوپر سیلز ٹیکس نہیں ہے، سولر پینل پورا بنایا ہوا امپورٹ کیا جائے تو اس پرسیلز ٹیکس نہیں ،سولر پینلز کے پارٹس امپورٹ کرکے یہاں تیار کیا جائے تو ٹیکس ہے، سولر پینلز پہلے بہت مہنگے تھے اب کافی سستے ہوچکے ہیں۔

مزید پڑھیں : بجٹ 26-2025 میں سولر پینل پر ٹیکس سے پریشان شہریوں کیلیے بڑی خوشخبری

چیئرمین کمیٹی نوید قمر نے کہا کہ تمام سیاسی جماعتوں نے ایوان میں سولر پر ٹیکس کی مخالفت کی، پیسے ہی جمع کرنےہیں تو اس کے اورلاکھوں طریقےہیں۔

رکن کمیٹی کا کہنا تھا کہ مارکیٹ چیک کریں کہ 2ہفتےمیں سولر کی قیمتیں کتنی بڑھی ہیں، جب سے سولر پر ٹیکس کا اعلان ہوا سولر پینل مہنگے ہوگئے، غریب آدمی کیلئے سولر پر 18 فیصد جی ایس ٹی ناقابل برداشت ہے۔

رکن کمیٹی مرزا افتخار بیگ نے کہا کہ ری نیوایبل انرجی کی بات کر رہے ہیں تو سولر پر ٹیکس ہونا ہی نہیں چاہئیے، مقامی طور پر تیار کردہ سولر پینل کا معیار بہت ہی خراب ہے، امپورٹڈ سولر پینلز مقامی تیارہ کردہ پینلز کی نسبت کافی سستے ہیں۔

چیئرمین ایف بی آر نے بتایا کہ سولر پر18 فیصد جی ایس ٹی سے 20 ارب روپے آئیں گے، جس پر رکن کمیٹی شہرام ترکئی کا کہنا تھا کہ ٹیکنالوجی ملک میں لانی ہے تو حکومت لوگوں کو ریلیف دے، پاکستان میں کاروباری لاگت پہلے ہی بلند ہے اوپر سے ٹیکس لگا رہے ہیں۔

چیئرمین کمیٹی نوید قمر نے کہا کہ سولر پینل پر ٹیکس کے حوالے سے ہمارا موقف واضح ہے، جس پر وزیر خزانہ محمد اورنگزیب نے جواب دیا کہ آپ کی تجویز نوٹ کرلی گئی ہے۔

کمیٹی ارکان نے کثرت رائے سے ایف بی آر کی تجویز کو مسترد کردیا، تاہم رکن کمیٹی جاوید حنیف نے کہا کہامپورٹڈ سولر پینل پاکستان میں ڈمپ ہورہا ہے، امپوٹڈ سولر پر 18 فیصد سیلز ٹیکس لگایا جائے، امپورٹڈ سولر پر ٹیکس چھوٹ دی جاتی رہی تو پاکستان میں کبھی نہیں بنے گا۔