جرمن چانسلر فریڈرک مرز نے دھمکی دی ہے کہ اگر ایران باز نہ آیا تو تباہ کن کارروائی ہوگی۔

الجزیرہ کی رپورٹ کے مطابق جرمن چانسلر فریڈرن مرز کا کہنا ہے کہ ایران پیچھے نہ ہٹا تو جوہری پروگرام کا مکمل خاتمہ ہمارے ایجنڈے پر ہے۔

انہوں نے کہا کہ ایرانی جوہری پروگرام کے خاتمے کا مقصد اسرائیل تنہا حاصل نہیں کرسکتا، ایران نے نہیں مانا تو جوہری پروگرام مکمل طور پر تباہ کردیا جائے گا۔

جرمن چانسلر نے کہا کہ حماس اور حزب اللہ جیسے گروپوں کے پیچھے تہران کا ہاتھ ہے، 7 اکتوبر کا اسرائیل پر حملہ ایرانی حکومت کے بغیر ممکن نہ تھا۔

ایران اسرائیل جنگ سے متعلق تازہ ترین خبریں

ان کا کہنا ہے کہ ایران مذاکرات کی میز پر واپس آئے تو فوجی کارروائی کی ضرورت نہیں ہوگی۔

فریڈرک مرز کا کہنا ہے کہ ایران کمزور ہوچکا، سفارتی مدد کی پیشکش اب بھی برقرار ہے، ایرانی حکومت شاید اب دوبارہ اپنی پرانی طاقت حاصل نہ کرسکے، ایران کا مستقبل غیر یقینی ہوچکا ہے انتظار کرنا ہوگا، صورتحال دیکھنا ہوگی۔

جرمن چانسلر نے مزید کہا کہ اسرائیل کے پاس فوجی سازو سامان زیادہ نہیں لیکن امریکا کے پاس ہے، کوئی نیا منظر نامہ بنتا ہے تو جرمنی، فرانس اور برطانیہ سفارتی مدد کو تیار ہوں گے۔

اسرائیلی وزیراعظم نیتن یاہو کا کہنا ہے کہ ایران کا ایٹمی اور بلیسٹک میزائل پروگرام انسانیت کے لیے خطرہ ہے۔

اسرائیلی وزیراعطم نیتن یاہو نے ایرانی اپوزیشن کے برطانیہ سے چلنے والے ٹی وی چینل کو انٹرویو دیتے ہوئے کہا کہ ایرانی عوام کی آزادی کا وقت آگیا ہے، ایران کے خلاف جنگ سے عوام کو آیت اللہ حکومت گرانے کا موقع ملے گا۔

انہوں نے کہا کہ ہماری جنگ دفاعی ہے لیکن آزادی کی راہ بھی ہموار ہورہی ہے، آزادی کی گھڑی آن پہنچی ہے۔

ایران اسرائیل جنگ سے متعلق تازہ ترین خبریں

نیتن یاہو کا کہنا تھا کہ ایرانی عوام کو غربت، موت اور دہشت گردی کے علاوہ کچھ نہیں ملا، عوام ہی ایران کا مستقبل ہیں یہ آمر زیادہ دیر نہیں چلیں گے۔

اس سے قبل اسرائیلی وزیر دفاع کاٹز کا کہنا تھا کہ میں ایرانی آمر کو خبردار کرتا ہوں وہ بھی اسی طرح انجام کو پہنچ سکتے ہیں، جیسا عراق کے معزول صدر صدام حسین کا ہوا تھا۔

کاٹز کا کہنا تھا کہ خامنہ ای پڑوسی ملک کے ڈکٹیٹر کی قسمت کو یاد رکھیں، جس نے اسرائیل کے خلاف یہی کچھ کیا تھا جو وہ آج کر رہے ہیں۔

اسرائیلی وزیر دفاع نے تہران کے رہائشیوں کیلئے اسرائیلی دھمکیوں کو دہراتے ہوئے کہا تہران میں حکومت اور فوجی اہداف کے خلاف کارروائی جاری رکھیں گے۔