نجکاری بورڈ کا اجلاس اسلام ٓباد مین ہوا جس میں اکتیس اداروں کی نج کاری کے لیے حکمت عملی پر غور کیا گیا۔اسلام آباد میں وزارت نج کاری کے ذرائع کے مطابق کہ نج کاری بورڈ کے اجلاس میں پی آئی اے اورپاکستان اسٹیل کی نج کاری کے لیے مالیاتی مشیرمارچ تک مقررکرنے پرغور کیا گیا۔

اجلاس میں اتفاق کیا گیا کہ بجلی کی تقسیم کارکمپنیوں کی نج کاری اولین فہرست میں شامل نہیں جب کہ نیشنل پاورکنسٹرکشن کمپنی کی نج کاری اولین ترجیحات میں شامل ہے۔ اوجی ڈی سی ایل اور پی پی ایل کے شیئرز براہ راست عوام کو فروخت کرنے کے لیے بھی طریقہ کار بھی زیر بحث آیا جب کہ حبیب بینک، یوبی ایل کے حصص فروخت کرنے کی حکمت عملی پر بھی بات چیت ہوئی۔

اسلام آباد چیمبر آف کامرس اینڈ انڈسٹری نے یونیورسٹیوں اور صنعتی شعبہ کے مابین قریبی روابط کو فروغ دینے اورتحقیقی سرگرمیوں میں تعاون بڑھانے کے لئے بحریہ یونیورسٹی کے ساتھ باہمی سمجھوتے کی ایک یاداشت پر دستخط کر دیئے ہیں ، آئی سی سی آئی کے صدر شعبان خالد اور بحریہ یورنیورسٹی کے ریکٹر وائس ایڈمرل (ریٹائرڈ) شاہد اقبال ایچ آئی (ایم) نے سمجھوتے کی یاداشت پر دستخط کئے۔

جس کے تحت دونوں ادارے مختلف شعبوں بشمول بحریہ یونیورسٹی کے طلبا کو صنعتی شعبے میں انٹرن شپ اور روزگار کے مواقع فراہم کرنا، مختلف شعبوں میں طلبا کی پیشہ وارانہ ترقی کیلئے مشترکہ طور پر شارٹ کورسز تیار کرنا اور باہمی کاوشوں سے جدید نصاب کو فروغ دینے کیلئے تعاون کریں گے ۔

اسلام آباد چیمبر آف کامرس اینڈ انڈسٹری کے صدر شعبان خالد نے اس موقع پر کہا کہ ترقی یافتہ اقوام نے تعلیمی اداروں اور صنعتی شعبے کے مابین قریبی تعلقات کو فروغ دے کر شاندار ترقی حاصل کی ہے ، لہٰذا ہمیں بھی ان کے نقش قدم پر چلتے ہوئے یونیورسٹیوں اور صنعتی شعبے کے درمیان تعلقات کومستحکم کرنا ہو گا تا کہ مشترکہ کوششوں سے ملک کیلئے ویلیو ایڈڈ مصنوعات تیار کر کے تجارت و برآمدات کو فروغ دیا جا سکے، بحریہ یونیورسٹی کے ریکٹر وائس ایڈمرل (ریٹائرڈ) شاہد اقبال نے اپنے خطاب میں کہا کہ بحریہ یونیورسٹی نے کوالٹی سٹینڈرز پر کبھی سمجھوتہ نہیں کیا اور بحریہ آج کے نوجوان کو مستقبل کا قائد بنانے کیلئے پوری طرح کوشاں ہے۔

وزیر مملکت برائے ٹیکسٹائل انڈسٹری وتجارت انجینئر خرم دستگیر نے کہا ہے کہ یورپی پارلیمنٹ کی طرف سے پاکستان کو جی ایس پی پلس کا درجہ حاصل ہونے سے 10 سال تک یورپی ممالک کو ڈیوٹی فری ٹیکسٹائل مصنوعات برآمد کی جا سکیں گی، اپنے ایک بیان میں انہوں نے کہا کہ حکومت عالمی منڈی تک پاکستانی مصنوعات کو رسائی دلوانے کیلئے موثر حکمت عملی کے تحت کام کررہی ہے ، جس کے مثبت نتائج سامنے آنا شروع ہوگئے ہیں

وزیر مملکت انجینئر خرم دستگیر نے بتایا کہ جی ایس پی کا درجہ حاصل ہونے سے پاکستان کی مجموعی برآمدات میں سالانہ 29 فیصد جبکہ ٹیکسٹائل کے شعبے کی برآمدات میں 38 فیصد اضافہ ہوگا، انہوں نے بتایا کہ پاکستان آئندہ 10 سال تک 6 ہزار ڈیوٹی فری ٹیکسٹائل مصنوعات 27 یورپی ممالک کو برآمد کرسکے گا۔