رواں مالی سال 2013-14ء کے پانچویں مہینے نومبر2013ء کے دوان تیل دار اور پھلی دار اجناس کی برآمدات میں دوگنا سے بھی زائد کا اضافہ ریکارڈ کیا گیا۔
پاکستان ادارہ برائے شماریات(پی بی ایس) کے اعدادوشمار کے مطابق اکتوبر2013ء کے دوران 4.1 ملین ڈالرکی برآمدات کی گئی تھیں جبکہ نومبر2013ء میں تیل دار اور پھلی دار اجناس کی برآمدات سے 8.7ملین ڈالر کا زرمبادلہ کمایا گیا۔
پاکستان تحریک انصاف کے چیئرمین عمران خان آج کراچی میں تحریک انصاف کے بلدیاتی امیدواروں کے کنونشن سے خطاب کریں گے۔
بلدیاتی اداروں کے امیدواروں کا کنونشن کراچی کے مقامی ہوٹل میں ہوگا، خطاب میں عمران خان بلدیاتی انتخابات کے حوالے سے تحریک انصاف کے لائحہ عمل کا بھی ممکنہ طور پر اعلان کریں گے، کنونشن میں تحریک انصاف کے بلدیاتی انتخابات میں حصہ لینے والے کراچی بھر کے امیدوار شریک ہوں گے۔
سپریم کورٹ نے کنٹونمنٹ بورڈ میں انتخابات کرانے کیلئے الیکشن کمیشن کو وزارت دفاع سے تحریری طور پر تاریخ لینے کا حکم دے دیا۔
سپریم کورٹ میں کنٹونمنٹ بورڈ میں بلدیاتی انتخابات سے متعلق کیس کی سماعت ہوئی، سماعت کے دوران ایڈیشنل اٹارنی جنرل شاہ خاور نے کہا کہ کنٹونمنٹ کے علاقوں میں فروری میں بلدیاتی انتخابات ممکن نہیں کیونکہ وفاقی حکومت کنٹونمنٹ کے علاقوں میں انتخابات کے لئے تیار نہیں۔
جسٹس عظمت سعید کا کہنا تھا کہ یہ کہانی پرانی ہے نئے کہانی سنائیں، جسٹس عظمت سعید نے حکم دیا کہ الیکشن کمیشن وزارت دفاع سے تحریری طور پر بلدیاتی انتخابات کی تاریخ لے، جس کے بعد کیس کی سماعت نو جنوری تک ملتوی کر دی گئی۔
سابق صدر پرویزمشرف کی میڈیکل رپورٹ خصوصی عدالت میں پیش کردی گئی، جس کا جائزہ لے کر پرویز مشرف کو عدالت میں پیشی سے استثنٰی دینے یا نا دینے کا فیصلہ کیا جائے گا۔
اس سے قبل پرویز مشرف کی میڈیکل رپورٹ عدالت میں پہنچائی گئی، سابق صدر پرویز مشرف کی میڈیکل رپورٹ کو انتہائی خفیہ رکھا گیا ہے، جو سربمہر لفافے میں بند ہے۔
پرویز مشرف کی میڈیکل رپورٹ ملنے پر تین رکنی بنچ نے رپورٹ کا معائنہ کیا ، بنچ کے سربراہ جسٹس فیصل عرب نے فریقین کے وکلا کو رپورٹ ملنے کی اطلاع کر دی ہے۔
وکلا کی درخواست پر انہیں میڈیکل رپورٹ کی نقول فراہم کرنے کی ہدایت کردی، جسٹس فیصل عرب نے کہا کہ وکلا دو دن تک رپورٹ کا بغور مطالعہ کر لیں۔
آرمڈ فورسز انسٹی ٹیوٹ آف کارڈیا لوجی کے ذرائع سے ملنے والی اطلاعات کے مطابق سابق صدر پرویز مشرف کے جسم میں یورک ایسڈ کی مقدار، بلڈ سی ٹی اور کولیسٹرول لیویل جانچنے کے لئے خون کے تازہ نمونے لے کر ٹیسٹ کے لئے لیبارٹری بھجوایئے گئے تھے۔
اسپتال ذرائع کے مطابق پرویز مشرف کو سی سی یو سے وارڈ میں منتقل کرنے کا ابھی فیصلہ نہیں کیا گیا ۔
عبدالرشید غازی قتل کیس میں عدالت نے اٹھارہ جنوری کو سابق صدر پرویز مشرف یا ان کی میڈیکل رپورٹس پیش کرنے کا حکم دیدیا۔
عبدالرشید غازی قتل کیس کی سماعت سیشن جج واجد علی کی عدالت میں ہوئی، کیس کی سماعت کے دوران عدالت نے استفسار کیا کہ پرویز مشرف کو آج عدالت پیش ہونا تھا، وہ کیوں نہیں آئے جس پر مشرف کے وکلا کی جانب سے عدالت کو بتایا گیا کہ پرویز مشرف بیمار ہیں، اس لئے عدالت میں پیش نہیں ہوسکتے۔
عدالت نے کیس کی سماعت اٹھارہ جنوری تک ملتوی کرتے ہوئے وکلا کو ہدایت دی کہ آئندہ سماعت میں پرویز مشرف کو پیش کیا جائے یا ان کی بیماری کی صورت میں میڈیکل رپورٹ عدالت میں پیش کی جائیں۔
لاہور کے علاقے فیصل ٹاؤن میں گھریلو ملازمہ کے قتل کی تحقیقات نے نیا رخ اختیار کرلیا، پولیس حکام کا کہنا ہے کہ مقتولہ گھریلو ملازمہ سے زیادتی کا شبہ ہے۔
پولیس کے مطابق لاہور میں پرسرار طور پر ہلاک ہونے والے گھریلو ملازمہ سے زیادتی کا شبہ ہے، فرانزک ٹیسٹ اور پوسٹ مارٹم رپورٹ آنے کے بعد حتمی فیصلہ ہوسکے گا۔
پولیس حکام کا کہنا ہے کہ گھر کے مالک اور اس کے تین بیٹوں کو گرفتار کیا گیا ہے، گھریلو ملازمہ کی ابتدائی پوسٹ مارٹم رپورٹ میں انکشاف کیا گیا تھا کہ عذرا کی موت خود کشی نہیں، عذرا کی موت گلا دبانے سے ہوئی۔
رپورٹ کے مطابق خودکشی کے شواہد نہیں ملے، گلا گھونٹنے کے واضح نشانات موجود ہیں، دو روز قبل فیصل ٹاؤن میں عذرا بی بی نامی چودہ سالہ ملزامہ کی لاش گھر کی دوسری منزل پر ملی تھی۔
ورثاء نے الزام عائد کیا ہے کہ اسے قتل کیا گیا جبکہ گھر کی مالکن کا کہنا تھا کہ عذرا پانچ روز کے بعد کام پر آئی تو کافی پریشان تھی، اس نے گھریلو پریشانی کی وجہ سے گلے میں پھندا ڈال کر خودکشی کی ہے۔
سعودی عرب کے وزیر خارجہ سعود الفیصل پاکستان پہنچ گئے ، وہ آج وزیر اعظم نوازشریف سے ملاقات کریں گے۔
سعودی وزیر خارجہ سعود الفیصل پیر کی شام سعودی عرب سے اسلام آباد پہنچے، جہاں انکا وزیراعظم کے مشیر برائے خارجہ امور سرتاج عزیز نے استقبال کیا، وزیراعظم سے سعود الفیصل کی ملاقات میں سیکورٹی سمیت دیگر امور میں تعاون بڑھانے پر بات چیت ہوگی۔
سعودی وزیر خارجہ کی آمد سے قبل وزیراعظم کی زیر صدارت اہم اجلاس ہوا، جس میں مشیر خارجہ امور سرتاج عزیز نے اجلاس کے شرکاء کو بریفنگ دی، نواز شریف سے سعود الفیصل کی ملاقات کے بعد دفتر خارجہ میں سرتاج عزیز اور ان کے سعودی ہم منصب مشترکہ پریس کانفرنس سے خطاب کریں گے۔
خصوصی عدالت میں پرویز مشرف کیخلاف غداری مقدمے کی سماعت جاری ہے، سماعت میں مشرف کے وکیل انور منصور نے جوابی دلائل دیتے ہوئے سب سے پہلے گزشتہ روز عدالت میں ہونے والے شور شرابے پر معذرت کی۔
اپنے دلائل میں انور منصور کا کہنا تھا کہ پرویز مشرف کے خلاف غداری کے مقدمے کی سماعت کرنے کے لئے بنائی گئی خصوصی عالت ایک خصوصی قانون کے تحت قائم کی گئی ہے ضابطہ فوجداری کے تحت نہیں، اس عدالت کے خصوصی مقاصد اور اختیارات ہیں یہ عام عدالت نہیں ہے ، سنگین غداری اور توہین عدالت آئینی جرائم ہیں اور ان کے لئے رہنمائی بھی آئین سے لینی ہوگی۔
مشرف کے وکیل کا کہنا ہے کہ آرٹیکل 6 اور 204 یا ان کے تحت بنائے گے قوانین میں دوران سماعت گرفتاری کی کوئی شق نہیں ہے، نہ ہی انیس سو چھیتر کے خصوصی عدالتوں کے قانون میں ملزم کی گرفتاری کیلئے ایسی کوئی شق موجود ہے۔
انور منصور کی اس دلیل پر جسٹس فیصل عرب نے سوال کیا کہ اگر مقدمہ توہین عدالت کا ہو یا آرٹیکل چھ کا، ملزم کے پیش نہ ہونے پر وارنٹ گرفتاری کیے جاسکتے ہیں، انہوں نے کہا کہ وکیل صفائی کے مطابق اگر عدالت کو گرفتاری کا اختیار نہیں ہے تو ملزم صرف اس لیے حکم عدولی کرسکتا ہے کہ اسے گرفتار نہیں کیا جائیگا، جسٹس فیصل عرب کے اس سوال پر پرویز مشرف کے وکیل نے کہا کہ وہ چائے کے وقفے کے بعد عدالت کے سوالات کا تسلی بخش جواب دیں گے ۔۔
کراچی میں حکومت کی عدم دلچسپی کی وجہ سے رکشہ اور ٹیکسی کے کرائے ہوائی جہاز سے بھی زیادہ ہوگئے۔
کراچی کے رکشہ اور ٹیکسی ڈرائیور بھی اسی طرح سی این جی بندش کا فائدہ اٹھاتے ہوئے فی کلو میٹر کرایہ چالیس سے پچاس روپے وصول کر رہے ہیں، اس طرح کراچی میں چلنے والے دو لاکھ سے زائد رکشہ ڈرائیور فی کلومیٹر کے حساب سے ہوائی جہاز کے اندرون ملک کرائے سے چار سو فیصد زیادہ کرایہ وصول کررہے ہیں۔
اس وقت ملک میں ٹرین کا سفر ڈیڑ روپے فی کلو میٹر کے آس پاس ہے جبکہ قومی ایئرلائین کا کرایہی بارہ روپے فی کلومیٹر کے قریب، کراچی میں گزشتہ چھ سال سے کوئی نئی ٹرانسپورٹ بس رجسٹر نہیں کرائی گئی جبکہ پرانی بسوں کی تعداد بھی روز بروز کم ہو رہی ہے ۔
سرکلر ریلوے جو کراچی کی سب سے بڑی ضرورت ہے، کئی برس سے بند پڑی ہے، اگر یہ ہی صورتحال جاری رہی تو آئندہ دو سالوں میں شہر میں ٹریفک کا دباؤ کنٹرول کرنا مشکل ہو جائے گا۔
امریکہ میں برفباری کا سلسلہ جاری درجہ حرارت منفی سینتالیس سینٹی گریڈ تک گر گیا، ریاست الینوائے کے گورنر نے آفت زدہ قرار دے دیا۔
امریکا خون جما دینے والی سردی اور انتہائی سرد برفانی ہواؤں کا شکار ہے۔ گذشتہ دو دہائیوں میں سب سے زیادہ سرد موسم نے معمول کی زندگی کو منجمد کردیا ہے، سڑکوں پر کئی فٹ برف سے ٹریفک معطل ہوا تو دوسری جانب طوفانی ہواؤں کی وجہ سے چار ہزار سے زائد پروازیں بھی منسوخ کردی گئیں۔
متعدد ریاستوں میں تعلیمی ادارے اور دفاتر بند کردئیے گئے ہیں اورحکام نے لوگوں کو گھروں میں رہنے کی ہدایت کی ہے، مونٹانا سے میری لینڈ کی ریاستوں تک ملک کی تقریباً نصف آبادی کے لیے انتہائی سرد ہواؤں کی وارننگ جاری کی گئی ہے اورعوام کو خبردار کیا گیا ہے کہ اگر وہ باہر نکلے تو ان کی جلد جم سکتی ہے۔
نیویارک اور واشنگٹن میں درجہ حرارت میں پینتالیس ڈگری تک کمی کا خدشہ ہے، شکاگو میں سرد موسم کی شدت اتنی زیادہ تھی کہ کہ شہر کے چڑیا گھر میں موجود قطبی برفانی ریچھوں کو بھی باہر نکلنے نہیں دیا گیا، کینیڈا اور جنوب مشرقی امریکہ میں دو فٹ تک برفباری ریکارڈ کی گئی۔
ریاست الی نوائے میں شدید برفباری کے باعث گورنر نے آفت زدہ قرار دیتے ہوئے ایمرجنسی بنیاد پرنیشنل گارڈز کو امداد فراہم کرنے کا حکم دیا ہے۔
امریکا خون جما دینے والی سردی اور انتہائی سرد برفانی ہواؤں کا شکار ہے۔ گذشتہ دو دہائیوں میں سب سے زیادہ سرد موسم نے معمول کی زندگی کو منجمد کردیا ہے۔ سڑکوں پر کئی فٹ برف سے ٹریفک معطل ہوا تو دوسری جانب طوفانی ہواؤں کی وجہ سے چار ہزار سے زائد پروازیں بھی منسوخ کردی گئیں۔متعدد ریاستوں میں تعلیمی ادارے اور دفاتر بند کردئیے گئے ہیں اورحکام نے لوگوں کو گھروں میں رہنے کی ہدایت کی ہے۔ مونٹانا سے میری لینڈ کی ریاستوں تک ملک کی تقریباً نصف آبادی کے لیے انتہائی سرد ہواؤں کی وارننگ جاری کی گئی ہے اورعوام کو خبردار کیا گیا ہے کہ اگر وہ باہر نکلے تو ان کی جلد جم سکتی ہے۔ نیویارک اور واشنگٹن میں درجۂ حرارت میں پینتالیس ڈگری تک کمی کا خدشہ ہے۔ شکاگو میں سرد موسم کی شدت اتنی زیادہ تھی کہ کہ شہر کے چڑیا گھر میں موجود قطبی برفانی ریچھوں کو بھی باہر نکلنے نہیں دیا گیا۔
