دشت/کوئٹہ: اکبر بگٹی ایکسپریس کے قریب بم دھماکہ ہوا جس کے نتیجے میں 4 بوگیاں پٹری سے اتر گئیں اور ان میں سوار متعدد افراد زخمی ہو گئے۔
کوئٹہ کے قریب دشت میں ریلوے ٹریک پر دھماکا ہواہے۔ جس کے نیتجےمیں متعدد افراد کے زخمی ہونے کی اطلاع ہے، ابتدائی تفصیلات کے مطابق اکبر بگٹی ایکسپریس لاہور سے کوئٹہ آرہی تھی۔ تاہم ریلوے ٹریک پر دھماکے سے ٹرین کی چار بوگیاں پٹری سے اتر گئیں جس کے نتجے میں متعدد افراد زخمی ہوگئے ہیں، زخمیوں کو فوری ابتدائی طبی امداد کے لئے اسپتال منتقل کردیاگیا۔
دبئی : نیوزی لینڈ اور پاکستان درمیان جاری دبئی ٹیسٹ کے چوتھے روز کا کھیل اختتام پزیرہوگیا،نیوزی لینڈ کی ٹیم کو پاکستان کیخلاف دوسری اننگز میں مشکلات درپیش ہیں، یاسر شاہ اور ذوالفقار بابر کی بولنگ پاکستان کو مضبوط پوزیشن میں لے آئی ہے۔
دبئی ٹیسٹ کے چوتھے روز پاکستان نے پہلی نامکمل اننگز دو سو اکیاسی رنز چھ کھلاڑی آؤٹ سے دوبارہ شروع کی۔ ٹیل اینڈرز کیساتھ ملکر وکٹ کیپر سرفراز احمد نے اسکور میں اضافہ کیا۔ آخری وکٹ کی شراکت میں سرفراز احمد نے راحت علی کیساتھ ملکر اسکور میں اکیاسی رنز جوڑے اور کیریئر کی تیسری سنچری بنائی، برینڈن میک کلم نے سرفراز احمد کو ایک سو بارہ رنز پر آؤٹ کرکے پاکستان کی اننگز تین سو ترانوے رنز پر ختم کردی۔
پہلی اننگز میں نیوزی لینڈ کو دس رنز کی سبقت حاصل رہی۔ ٹم ساؤتھی نے تین،ٹرینٹ بولٹ اور اش سودھی نے دو دو وکٹیں حاصل کیں۔۔ دوسری اننگز میں نیوزی لینڈ کو مشکلات کا سامنا کرنا پڑ رہا ہے، ذوالفقار بابر اور یاسر شاہ کی بولنگ کے سامنے کیوی بیٹسمین سنبھل کر کھیلنے میں ناکام ہوگئے ہیں، دن کے اختتام تک نیوزی لینڈ نے چھ وکٹوں پر ایک سو سرسٹھ رنز بنالیے اور پاکستان کیخلاف ایک سو ستتر رنز کی سبقت حاصل ہے۔
اسلام آباد: پاکستان اور روس کے درمیان دفاعی شعبےمیں تعاون بڑھانےکےمعاہدےپر دستخط ہوگئے، وزیردفاع خواجہ آصف کہتے ہیں دونوں ممالک میں دفاعی معاہدہ تاریخی سنگ میل ہے۔
وفاقی وزیر دفاع خواجہ آصف نے کہا ہے روس اور پاکستان کے درمیان دفاعی معاہدہ تاریخی سنگ میل ہے۔ پاکستان اورروس مضبوط تعلقات، علاقائی امن اور استحکام میں مدد فراہم کرینگے، ان کا کہنا تھا پاکستان کے ساتھ تعلقات کےفروغ کے لئے روس کےاقدامات قابل تعریف ہیں۔
روسی وزیر دفاع جنرل سرگئی شوگئی جو ان دنوں اکتالیس رکنی وفد کے ہمراہ پاکستان کے دورے پر ہیں ، ان کا کہنا تھا دہشت گردی کے خلاف جنگ میں پاکستانی عوام اور افواج کی قربانیاں قابل تحسین ہیں۔
لاہور: سانحہ ماڈل کی تحقیقات کرنے والی جوائنٹ انوسٹی گیشن ٹیم کا اجلاس لاہور میں ہوا ۔
لاہور میں سانحہ ماڈل ٹاؤن پر ہونے والا جے آئی ٹی کا اجلاس سی سی پی او کوئٹہ عبدالرزاق چیمہ کی سربراہی میں ہوا، ڈائریکٹر منہاج القرآن سیکرٹریٹ جواد حامد بیان ریکارڈ کروانے نہیں پہنچے جے آئی ٹی ذرائع کے مطابق انہیں اپنا بیان ریکارڈ کروانے کے لیے نوٹس جاری کیا تھا تاہم جواد حامدنے جے آئی ٹی کی جانب سےنوٹس موصول ہونے سے انکار کیا تھا۔
کراچی: محکمہ داخلہ سندھ نے صوبے میں ہائی الرٹ جاری کرتے ہوئے تمام حساس تنصیبات پر سیکیورٹی بڑھانے کی ہدایت کی ہے۔
سیکریٹری داخلہ سندھ ڈاکٹر نیاز عباسی کی جانب سے آئی جی سندھ اور صوبے کے تمام کمشنرز کو ایک مراسلہ لکھا گیا ہے جس میں کہا گیا ہے کہ حساس اداروں نے الرٹ جاری کی ہے جس میں خدشہ ظاہر کیا گیا ہے کہ کالعدم تحریک طالبان صوبے میں حساس تنصیبات پر حملے کی منصوبہ بندی کررہی ہے،جن خدشات کو سامنے رکھتے ہوئے قانون نافذ کرنے والے ادارے حساس تنصیبات کی سیکیورٹی کو فول پروف بنانے کی ہدایت کی گئی ہے۔
لاہور: سابق صوبائی وزیرقانون رانا ثناءاللہ طاہر القادری کے بیان پر بھڑک اٹھے ان کا کہنا تھا جسے جے آئی ٹی پر اعتراض ہے وہ عدالت جائے۔
لاہور میں طاہر القادری کی جے آئی ٹی پرکڑی تنقید نےحکومتی حلقوں میں ہل چل مچادی، سابق صوبائی وزیرقانون رانا ثناءاللہ بھی میدان میں آگئے اور واضح الفاظ میں کہہ ڈالا کہ اگر جے آئی ٹی پر طاہرالقادری کو اعتراض ہے تو وہ عدالت جائیں، سانحہ ماڈل ٹاؤن سازش نہیں تھا،وزیراعظم سمیت جس کو بھی جے آئی ٹی بلائی گی وہ پیش ہوگا۔
ان کا مزید کہنا تھا عدالت چاہے تو سانحہ ماڈل ٹاؤن کی رپورٹ عام کر دے،عمران خان کی باتیں بدنیتی پر مبنی ہیں، جے آئی ٹی جلد حقائق تلاش کر کے قوم کےسامنے لائے۔
کراچی: وزیراعلیٰ سندھ سید قائم علی شاہ نے اکیس نومبر کو لاڑکانہ میں ہونے والے پی ٹی آئی کے جلسے کے فول پروف انتظامات اور عمران خان کو مکمل سیکیورٹی فراہم کرنے کی ہدایت کی ہے۔
وزیراعلیٰ سندھ نے آئی جی سندھ کو ٹیلی فون کرکے ہدایت کی ہے کہ پی ٹی آئی کے جلسے اور منتظمین کو مکمل سیکیورٹی فراہم کی جائے۔
دوسری جانب سے سندھ کے وزیر اطلاعات شرجیل میمن نے پی ٹی آئی اے کے رہنماؤں ڈاکٹر عارف علوی اور پی ٹی آئی سندھ کے صدر نادر اکمل لغاری کو ٹیلی فون کرکے اس بات کی یقین دھانی کرائی کہ سندھ حکومت پی ٹی آئی کے لاڑکانہ میں ہونے والے جلسے میں کسی بھی قسم کی کوئی رکاوٹ نہیں ڈالے گی بلکہ ضلعی انتظامیہ اور صوبائی انتظامیہ کو ہر ممکن تعاون کرنے کی ہدایت کی گئی ہے۔
پی ٹی آئی کے رہنماء نادراکمل لغا ری کا کہنا ہے کہ تحریک انصاف سندھ میں اسٹیٹس کو کی جماعتوں کے مدمقابل آگئی ہے، جس سے پیپلزپارٹی بوکھلاہٹ کا شکار ہے ۔
اسلام آباد: پیٹرولیم مصنوعات ساڑھے تین سے پانچ روپے فی لیٹر تک سستی ہونے کا امکان ہے۔
عالمی منڈی میں مسلسل گرتی قیمت کےباعث یکم دسمبرسےپاکستان میں بھی پیٹرولیم مصنوعات کی قیمتوں میں کمی کا امکان ہے،اُوگرا ذرائع کےمطابق پیٹرول چار روپے،ہائی آکٹین پانچ روپےفی لیٹر سستا ہونےکا امکان ہے،اسی طرح مٹی کا تیل تین روپے65 پیسےاورہائی اسپیڈ ڈیزل تین روپےنوے پیسےفی لیٹر سستا ہونےکا امکان ظاہرکیاگیا ہے، عالمی مارکیٹ میں خام تیل کی قیمت پچھترڈالر فی بیرل تک نیچےآچکی ہے۔
کراچی: اسٹاک مارکیٹ میں جمعرات کوکاروبارکا آغاز ہی مندی سےہوا جس میں بتدری اضافہ ہوتاچلاگیا۔۔بڑےمالیاتی اداروں کی جانب سے شئیرزکی فروخت بڑھانےکےباعث دوران ٹریڈنگ مارکیٹ سات سو پینتیس پوائنٹس کی بڑی گراوٹ کاشکار ہوئی تاہم یہاں سے مارکیٹ میں ریکوری آتےدیکھی گئی۔
تجزیہ کاروں کےمطابق مسلسل اُوپرجانےکےبعد شئیر مارکیٹ میں ٹیکنیکل کریکشن آنی تھی جبکہ سیاسی صورتحال پھربگڑنے کےخدشات بھی مندی کی اہم وجہ رہے۔
ممبئی :بھارتی اداکارسلمان خان نے اپنی بہن ارپیتاخان کی شادی کے موقع پر اُسے 16کروڑروپے کا انتہائی مہنگافلیٹ بطور تحفہ دیا ہے۔
فلیٹ ممبئی کے پوش علاقے کارٹرروڈپر واقع ہے ۔ میڈیا رپورٹ کے مطابق ٹیرس فلیٹ کہلانے والے مکان سے ممبئی کا شاندار نظارہ کیا جا سکتا ہے اور ایک خاص بات یہ ہے کہ سلمان خان کی رہائش گاہ گلیکسی اپارٹمنٹ سے صرف پانچ منٹ کی مسافت پر ہے ۔
سلمان ارپتیا کو خود سے زیادہ دورنہیں کرنا چاہتے تھے اور اِسی لیے فلیٹ بھی قریبی علاقے میں خریدا ہے۔
