معروف عالم دین مولانا طارق جمیل نے اسکینڈل کوئن وینا ملک کو اپنے گھر پر کھانے پر مدعو کیا اور نکاح پر مبارکباد دی۔
وینا ملک نکاح کے بعد اپنے خاوند اسد بشیر خٹک کے ساتھ دبئی میں مقیم ہیں، معروف عالم دین مولانا طارق جمیل نے وینا ملک اور ان کے خاوند کو نکاح پر مبارکباد دی اور اپنے گھر کھانے پر مدعو کرکے دو سو ڈالر منہ دکھائی بھی دی، مولانا طارق جمیل نے وینا ملک اور ان کے خاوند کو عمرے پلس حج کی دعوت بھی دی۔
شہر قائد میں امن خواب سا بنتا جارہا ہے، آج بھی فائرنگ سے تین افراد جاں بحق اور ایک شخص زخمی ہوگیا، دوسری جانب رینجرز اور پولیس کارروائی کے دوران اسی سے زائد ملزمان کو گرفتار کرلیا گیا
کراچی کے علاقے اورنگی ٹاؤن چاندنی چوک کے قریب فائرنگ سے عمران نامی شخص جاں بحق ہوگیا جبکہ لانڈھی کے علاقے مرتضی چورنگی اور لیاری کے علاقے بہار کالونی میں فائرنگ سے دو افراد جاں بحق ہوگئے، نیو کراچی میں گودھرا اسٹاپ کے قریب فائرنگ سے ایک شخص زخمی ہوگیا۔
دوسری جانب ایس پی اورنگی چوہدری اسد کے مطابق پیرآباد فرنٹیئر کالونی میں پولیس نے چھاپے کے دوران تیس مشتبہ افراد کو حراست میں لےلیا، ساوتھ زون پولیس نے مختلف علاقوں سے تئیس ملزمان اور ایسٹ زون پولیس نے گیارہ ملزمان کو گرفتار کرکے اسلحہ، نقدی موبائل فون اور رکشا برآمد کرلیا۔
رینجرز نے گلشن اقبال، غریب آباد، گڈاپ، گلشن معمار، لانڈھی، کورنگی، نیو کراچی، نارتھ ناظم آباد، چنیسر گوٹھ، ماڈل کالونی اور نرسری میں چھاپوں کے دوران پچیس ملزموں کو گرفتار کرکے اسلحہ برآمد کرلی۔
وزارت آئی ٹی کے ماتحت اداروں پاکستان کمپیوٹر بورڈ اور ای جی ڈی کے تحت چلنے والے تیرہ منصوبوں میں مالی بے ضابطگیوں کا انکشاف ہوا ہے، وزیر مملکت برائے آئی ٹی انوشہ رحمان نے معاملہ نیب کے حوالے کرنے کے احکامات جاری کردیئے۔
وزیرمملکت برائے آئی ٹی نے گذشتہ برس ستمبر میں پاکستان کمپیوٹر بورڈ اور ای جی ڈی کے انٹرنل آڈٹ کے احکامات جاری کیے تھے جس کے نتیجے میں تیرہ منصوبوں میں شدید مالی بے ضابطگیاں پائی گئیں۔
ان منصوبوں کے تحت سی ڈی اے، وزارت داخلہ، اسٹیبلشمنٹ ڈویژن ، ایف آئی اے اور اسلام آباد پولیس سمیت دیگر اداروں کو ای سروسز فراہم کی جانا تھیں۔ وزیرمملکت برائے آئی ٹی انوشہ رحمان کا کہنا ہے کہ کرپٹ عناصر کے لیے وزارت کے لیے کوئی جگہ نہیں۔ آئی ٹی کے تمام منصوبوں کو شفاف بنایا جائے گا۔
وزیرداخلہ چوھدری نثارعلی خان کی زیرصدارت بارہ ربیع الاول کی سیکیورٹی انتظامات کا جائزہ لینے کے لیے اہم اجلاس منعقد کیا گیا ۔ وزیرداخلہ نے ہداہت کی کہ عید میلاد النبی ﷺ کے موقع پرسیکیورٹی انتہائی سخت بنائے جائیں ، سیکیورٹی اداروں اور انٹیلی جنس اداروں کی تعاون کو اورمضبوط کیا جائے ۔
راولپنڈی اوراسلام آباد پولیس مشترکہ پیٹرولنگ کوموثربنائی جائیں کراچی گورنرسندھ سے علماء نے ملاقات کی اجلاس منعقد ہوا، اجلاس میں علما سے خطاب کرتے ہوئے گورنر سندھ نے کہا کہ بارہ ربیع الاول کے حوالے سے کسی بھی ناخوشگوار واقعہ سے بچنے کے لئے فول پروف انتظامات کویقینی بنایا جائیگا۔
کراچی میں ڈی جی رینجرزنے بھی بارہ ربیع الاول کی سیکیورٹی کے کے حوالے سے اجلاس منعقد کیا، اجلاس میں سیکٹرکمانڈرز، سینئرافسران نے شرکت کی اورسیکیورٹی پلان کوحتمی شکل دی، اجلاس میں طے پایا کہ عارضی چیک پوسٹیں بناکرچوبیس گھنٹے میں اہلکارتعینات کیئے جائیں گے اورچھتوں پربھی اہلکارتعینات ہوں گے اس کے ساتھ ساتھ اسنیپ چیکینگ کے ساتھ سراغ رساں کتوں کی مدد سے روٹ کو کلیئر کیا جائے گا۔ علامہ اویس نورانی نے مطالبہ کیا ہے کہ گیارہ اوربارہ ربیع الاول کوعام تعطیل کی جائے
بھارتی ہائی کمشنر ٹی سی اے راگھوان نے کہا ہے کہ سابق صدر پرویز مشرف کا ٹرائل پاکستان کا اندرونی معاملہ ہے ، وزیر اعظم منموہن سنگھ کی خواہش ہے کہ وہ اپنی مدت ختم ہونے سے پہلے پاکستان کا دورہ کریں۔
ایوان صنعت و تجارت لاہور میں تقریب سے خطاب اور میڈیا سے گفتگو کرتے ہوئے بھارتی ہائی کمشنر کا کہنا تھا کہ پاکستان مخالفت کی بناء پر بھارت میں انتخابی مہم نہیں چلائی جا رہی، بہت سارے ایشوزکو انتخابی مہم کا حصہ بنایا گیا ہے۔
بھارتی وزیر اعظم منموہن سنگھ کی خواہش ہے کہ وہ اپنی مدت ختم ہونے سے پہلے پاکستان کا دورہ کریں، سابق صدر پرویز مشرف کا ٹرائل پاکستان کا اندرونی معاملہ ہے، انہوں نے کہا کہ بھارت نے یورپی یونین کی جانب سے پاکستان کو جی ایس پی پلس سٹیٹس ملنے کی مخالفت نہیں کی۔
لاہور کی معروف تجارتی مارکیٹ انارکلی بازار میں دکان کے تنازعہ پر تین افراد نے فائرنگ کر کے تاجر شاہ دین کو زخمی کر دیا، تاجروں نے ایک ملزم کو پکڑ کر تشدد کا نشانہ بنایا اور پولیس کے حوالے کر دیا۔
انارکلی بازار کے تاجر شاہ دین کی دکان کا تنازعہ چلا آرہا ہے، آج مالک دکان خالی کرانے کے لیے ساتھیوں کے ہمراہ آیا جس پر دونوں کے درمیان تلخ کلامی ہوئی، دکان کے مالک اور اسکے ساتھیوں نے فائرنگ کرکے شاہ دین کو زخمی کر دیا، ملزم فرار ہونے لگے تو تاجروں نے ایک ملزم کو پکڑ کر تشدد کا نشانہ بنایا اور پولیس کے حوالے کر دیا جبکہ دو ملزمان اپنی کار چھوڑ کر فرار ہوگئے، پولیس نے مقدمہ درج کر لیا۔
وزیرپیٹرولیم شاہد خاقان عباسی نے کہا ہے کہ توانائی بحران کا واحد حل ایل این جی ہے، قطر سے ایل این جی کی درآمد کے انتظامات مکمل ہیں تاہم ابھی تک نرخوں کا تعین باقی ہے۔
سینیٹرمحمد یوسف کی زیرصدارت پارلیمنٹ ہاوس اسلام آباد میں سینیٹ کی قائمہ کمیٹی برائے پیٹرولیم کا اجلاس ہوا۔جس میں ایل این جی کی درآمد، اس کے معاشی اثرات اورپاک ایران گیس پائپ لائن منصوبےکا تفصیلی جائزہ لیا گیا۔
وزیرپیٹرولیم اورسیکریٹری پیٹرولیم نے کمیٹی کوبریفنگ میں بتایا کہ ایران نےعالمی پابندیوں کے باعث پاکستان کو گیس پائپ لائن کیلئے پانچ سو ملین ڈالرکے فنڈزدینے سے معذرت کرلی ہےجس سے پائپ لائن کی تکمیل میں مسائل پیدا ہوگئےہیں۔
اس حوالے سے رواں ماہ کے آخرمیں ایرانی حکام سے بات چیت کیلئے وفد ایران جائے گا، کمیٹی کو بتایا گیا کہ قطر سے ایل این جی درآمد کرکے مکس گیس بنائیں گے جس سے قیمت میں اضافہ ہوگا تاہم اضافے کا اطلاق گھریلو صارفین کے ٹیرف پرنہیں ہوگا۔
گیس مہنگی کرنے کی تیاریاں آخری مراحل میں پہلے مرحلے میں صنعتی مقاصد کیلئے استعمال ہونے والی گیس مہنگی کرنے کی درخواست پر اُوگرا نے سماعت کے بعد فیصلہ محفوظ کرلیا۔
پاکستان کو آئی ایم ایف کے ساتھ معاہدے کے مطابق رواں سال بجلی مزید مہنگی کرنے کے علاوہ رواں ماہ گیس مہنگی کرنا ہوگی، جس کی تیاریاں بتدریج آگے بڑھ رہی ہیں گیس ڈسٹری بیوشن کی دوںوں کمپنیوں نےگیس مہنگی کرنےکیلئےآئل اینڈ گیس ریگولیٹری اتھارٹی کو درخواست دی تھی۔
پیرکو سوئی ناردرن کی گیس ٹیرف میں 69 روپےفی ایم ایم بی ٹی یواضافے کی درخواست پراُوگرا نےسماعت کے بعد فیصلہ محفوظ کرلیا، ذرائع کے مطابق سوئی ناردرن نے ابھی گھریلو صارفین کے ٹیرف برقرار رکھنے کی درخواست کی ہے تاہم سی این جی اور پاور پلانٹس کیلئےگیس 15 فیصد مہنگی کرنے کی درخواست کی گئی ہے۔
اسی طرح صنعتوں اور فرٹیلائیزر انڈسٹری کیلئے بھی گیس 15 فیصد مہنگی کرنے کی اجازت مانگی گئی ہے، سوئی ناردرن نے اُوگرا کو دی گئی درخواست میں کہا ہے کہ اگر ٹیرف میں اضافہ نہ کیا گیا تو سوئی ناردرن کو 6 ارب روپے کا نقصان ہوگا۔
نجکاری کمیشن کے نو منتخب بورڈ آف ڈائریکٹرز کا پہلا اجلاس بدھ کوطلب کرلیا گیا، پی آے اے اوراسٹیل مل سمیت اکتیس سرکاری اداروں کی نجی شعبےکو فروخت کے معاملات کا جائزہ لیا جائےگا۔
اجلاس کی صدارت وزیرمملکت اور چئیرمین نجکاری کمیشن محمد زبیرکریں گے، ذرائع کے مطابق اجلاس میں اکتیس سرکاری اداروں کی نجکاری کا روڈ میپ تیار کیا جائے گا۔
پی آئی اے،اسٹیل ملز اور کنونشن سنٹر اسلام آباد کی نجکاری پہلے مرحلے میں کی جائے گی، اوجی ڈی سی ایل اور پی پی ایل کے حصص اسٹاک مارکیٹ کے ذریعے فروخت کا بھی فیصلہ کیا جائے گا۔
کراچی اسٹاک مارکیٹ میں ریکارڈ بننے کا سلسلہ پیر کو بھی جاری رہا، مارکیٹ دو نئے ریکارڈ بناکر تاریخ کی بلندترین سطح پر پہنچ گئی۔
کراچی اسٹاک مارکیٹ میں تیزی کارجحان کاروباری ہفتےکےآغاز پربھی برقراررہا۔۔بعض حلقوں کی جانب سےمارکیٹ میں پیرکو کریکشن آنے کی توقعات بھی غلط ثابت ہوئیں۔
مارکیٹ میں تمام دن تیزی رہی اورایک موقع پر 250 سے زائد پوائنٹس کا نمایاں اضافہ بھی دیکھا گیا تاہم بینکنگ اورسیمنٹ سیکٹر میں فروخت کے دباؤ سے کاروبارکےاختتام پر یہ اضافہ 123 پوائنٹس تک محدود ہوگیا۔
مارکیٹ کا بینچ مارک 100 انڈیکس 26170 پوائنٹس کی ریکارڈ سطح پر بند ہوا، ۔ستاون ارب روپے کے اضافے سے پیر کو پہلی بار مارکیٹ سرمائے کی مالیت تریسٹھ کھرب روپے سے تجاوز کرگئی۔
