شامی حکومت نے خواتین کےلیے ساحل پر برقینی پہننے کا حکم دے دیا۔

بین الاقوامی میڈیا رپورٹس کے مطابق شامی حکومت نے عوامی ساحلوں پر خواتین کے لیے نیا ڈریس کوڈ جاری کر دیا ہے۔

حکم نامے کے مطابق خواتین کو پورا جسم ڈھانپنے والا لباس پہننا ہو گا اور عوامی مقامات پر مغربی طرز کے لباس پر پابندی ہو گی۔

البتہ نجی ہوٹلز اور کلبز میں اجازت ہو گی۔

خواتین کو ساحل اور دیگر علاقوں کے درمیان سفر کے دوران ڈھیلا لباس پہننےکی ہدایت کی گئی ہے۔

مردوں پر ہوٹل لابی یا ریسٹورنٹس میں نیم برہنہ جسم کے ساتھ آنے پر پابندی عائد کر دی گئی ہے۔ فور یا فائیو اسٹار ہوٹلز اور نجی کلبز میں مغربی لباس کی مشروط اجازت ہو گی۔

وزارت سیاحت کا کہنا ہے کہ یہ پابندیاں عوامی مفاد میں عائد کی گئی ہیں۔ شام کے عبوری آئین میں شریعت کے کردار پر سخت مؤقف اختیار کیا گیا ہے اور اسلام پسند مذہبی رہنما صدر احمد الشرع نے ان حکامات پر دستخط کیے ہیں۔

امریکی صدر ڈونلڈ ٹرمپ نے ایران سے جنگ کا انتباہ دے دیا۔

صدر ٹرمپ نے متنبہ کیا ہے کہ ایران سے جوہری معاہدے کے بجائے جنگ کا خطرہ بڑھ رہا ہے، ایران سے جوہری معاہدہ ممکن نظر نہیں آتا اور جوہری پروگرام روکنے کے امکانات کم ہوتے جا رہے ہیں۔

ٹرمپ نے ایران پر جوہری معاہدے میں تاخیری حربے استعمال کرنے کا الزام عائد کیا ہے۔

ان کا کہنا تھا کہ معاہدہ ہو جائے تو بہتر ہے ورنہ ایران کو جوہری ہتھیار نہیں بنانے دیں گے اسرائیلی وزیراعظم سے ایران کے معاملےپر تفصیلی بات چیت ہوئی ہے۔

ایرانی وزیر دفاع بریگیڈیئر جنرل عزیز نصیرزادہ نے کہا ہے کہ اگر امریکا کے ساتھ فوجی تنازع پیدا ہو گیا تو خطے میں امریکی اڈوں پر حملہ کر دیں گے۔

ایرانی وزیردفاع نے کہا کہ امید ہے امریکا سےجوہری مذاکرات نتیجہ خیز ہوں گے مذاکرات ناکام اور ہم پر تنازع مسلط کیا گیا تو بلاشبہ دشمن کا نقصان ہم سے زیادہ ہو گا۔

انہوں نے کہا کہ خطے میں تمام امریکی اڈے ہماری دسترس میں ہیں ہم نشانہ بنائیں گے ہم بےخوف ہو کر تمام امریکی اڈوں کو میزبان ممالک میں نشانہ بنائیں گے۔

ایران کی وزارت خارجہ کے مطابق جلد ہی امریکا کو جوہری معاہدے کے لیے ایک جوابی تجویز پیش کی جائے گی

یورپی یونین نے اسرائیل سے فلسطینی بینکوں سے رابطہ منقطع کرنے کا فیصلہ واپس لینے کا مطالبہ کر دیا۔

غیرملکی خبر ایجنسی کے مطابق اسرائیلی بینکوں کو فلسطینی بینکوں سے تعاون نہ کرنےکی ہدایت دی گئی ہے جس پر یورپی یونین نے اسرائیلی وزیرخزانہ کے اقدام پر شدید تشویش کا اظہار کیا ہے۔

یورپی یونین نے خبردار کیا ہے کہ اسرائیلی اقدام سے فلسطینی اتھارٹی کےخاتمےکا خطرہ ہے اور اسرائیلی فیصلے سے فلسطینی مالیاتی نظام تباہ اور معیشت مزید بدحال ہو سکتی ہے۔

یورپی یونین نے اسرائیل سے فیصلہ واپس لینے اور اشتعال انگیز اقدامات سے گریز کرنے کی اپیل کی ہے۔

ٹائمز آف اسرائیل کے مطابق اسرائیلی حکومت کے چند اہم وزرا نے بڑے یورپی ممالک کو پیغام دیا ہے کہ انھوں نے فلسطین کو تسلیم کیا تو اسرائیل مغربی کنارے کے کچھ حصوں کو زبردستی اسرائیل کے ساتھ شامل کر دے گا۔

اسرائیلی اخبار ہارٹز کے مطابق اسرائیلی اسٹریٹجک امور کے وزیر رون ڈیرمر نے فرانسیسی وزیر خارجہ ژان نوئیل بارو اور برطانوی وزیر خارجہ ڈیوڈ لامی کو خبردار کیا ہے کہ اگر فلسطینی ریاست کو تسلیم کیا گیا تو اسرائیل اس کے جواب میں مغربی کنارے مخصوص علاقہ اپنے ساتھ ضم کر لے گا، اور غیر مجاز بستیوں کو قانونی حیثیت دے دے گا۔

اسرائیلی میڈیا کا یہ بھی کہنا ہے کہ وزیر خارجہ جدعون ساعر نے بھی برطانیہ، فرانس اور دیگر ممالک کے اپنے ہم منصبوں کو ایک ایسا ہی پیغام بھیجا ہے، جس میں خبردار کیا گیا ہے کہ اسرائیل کے خلاف کسی بھی اقدام کا مقابلہ اسرائیلی اقدامات سے کیا جائے گا، ان اقدامات میں مغربی کنارے کی بستیوں اور وادی اردن (اردن وادی) کے کچھ حصوں پر خودمختاری کا اطلاق کرنا بھی شامل ہے۔

واضح رہے کہ چند دن قبل مالٹا کے وزیر اعظم نے بھی فلسطین کو تسلیم کرنے کا اعلان کیا تھا، رابرٹ ابیلا نے اعلان کیا کہ ان کا ملک آئندہ ماہ فلسطینی ریاست کو تسلیم کر لے گا، ایک سیاسی تقریب کے دوران ابیلا نے کہا کہ مالٹا 20 جون کو اقوام متحدہ کی کانفرنس کے بعد اپنا مؤقف باضابطہ بنائے گا اور اس اقدام کو ایک ’اخلاقی ذمہ داری‘ قرار دے گا۔