شوبز انڈسٹری کے معروف اداکار فہد مصطفیٰ نے بطور پروڈیوسر مالی فوائد پر خاموشی توڑ دی۔
اے آر وائی ڈیجیٹل کے ٹاک شو ‘بز’ میں میزبان حسن چوہدری سے بات کرتے ہوئے فہد مصطفیٰ نے اداکاروں کی مشترکہ شکایت کا جواب دیا جن کا ماننا ہے کہ ایک پروڈیوسر پروجیکٹ کے تمام مالی فوائد حاصل کرتا ہے، جب کہ وہ اسے ہٹ بنانے کی تمام تر کوششیں کرتے ہیں۔
انہوں نے کہا کہ میں نے بہت سے اداکاروں میں عام چیز دیکھی ہے کہ وہ سمجھتے ہیں ایک پروڈیوسر بہت پیسہ کماتا رہا ہے۔
فہد مصطفیٰ نے کہا کہ اگرچہ میں اے آر وائی ڈیجیٹل کا لازمی حصہ ہوں لیکن یہ یقین کرنا حماقت ہوگی کہ چینل صرف میری وجہ سے چلتا ہے۔
اداکار نے کہا کہ سچ پوچھیں تو پروڈیوسر اس ملک میں سب سے کم معاوضہ کماتا ہے لیکن اگر وہ کماتے بھی ہیں تو یہ آپ کو پریشان کیوں کررہا ہے، یقیناً میں کما رہا ہوں جس کے لیے ڈرامہ پروڈیوس کیا ہے کوئی خیراتی کام تو نہیں کیا۔
فہد مصطفیٰ نے اداکاروں کو مشورہ دیا کہ وہ تلخ ہونے کے بجائے فوائد حاصل کرنے کے لیے پروڈکشن میں قدم رکھ سکتے ہیں۔
اداکار نے کہا کہ یہ واقعہ مجھے تکلیف دیتا ہے کہ ہم دوسروں کے لیے کام کرتے ہوئے ان کی بھلائی کیوں نہیں کرسکتے۔
