کابل میں غیر ملکی ریستوران پر خودکش حملے میں سولہ افراد ہلاک جبکہ اقوام متحدہ کے چار اہلکار لاپتہ ہوگئے۔

غیر ملکی میڈیا کے مطابق کابل میں ایک خودکش حملہ آور نے غیر ملکی ریستوران میں داخل ہوکر خود کو دھماکے سے اڑا دیا, جس کے نتیجے میں سولہ افراد ہلاک ہوئے۔

میڈیا کے مطابق دھماکے کے وقت ریستوران میں غیر ملکیوں کی ایک بڑی تعداد میں موجود تھی، دھماکے کے بعد قانون نافذ کرنے والے اداروں نے علاقے کو گھیرے میں لیکر لاشوں اور زخمیوں کو اسپتال منتقل کیا۔

طالبان ترجمان نے اس حملے کی ذمہ داری قبول کرلی ہے، اقوام متحدہ نے دھماکے کے بعد اپنے چار اہلکاروں کے لاپتہ ہونے کی تصدیق کی ہے، کابل پولیس سربراہ کے مطابق ہلاک ہونے والوں میں افغان اور غیر ملکی شامل ہیں۔

جن کی شناخت بعد میں جاری کی جائے گی، دوسری جانب برطانوی محکمہ خارجہ نے اپنے ایک شہری جبکہ آئی ایم ایف نے ایک مقامی اہلکار کے ہلاکت کی تصدیق کردی ہے۔
    
   

مصر میں حکومت کی جانب سے عائد کردہ پابندی کے باوجود قاہرہ میں مظاہرین اور فورسز کے درمیان جھڑپیں جاری ہیں۔

سرکاری ذرائع کے مطابق مصر میں نئے آئین اور فوجی حکومت کے خلاف اخوان المسلمون کا ملک گیر احتجاج جاری ہے، پولیس کے ساتھ تازہ جھڑپوں میں دو مظاہرین جاں بحق اورمتعدد زخمی ہوگئے ہیں۔

تازہ جھڑپیں مصرکے شہر قاہرہ، اسکندریہ، سوئیز اور دیگر شہروں میں ہوئیں، زخمی ہونے والوں کو احتجاجی کیمپوں میں منتقل کردیا گیا ہے، جہاں انہیں طبی امداد دی جارہی ہے۔

تھائی لینڈ کے وزیراعظم کے خلاف مظاہرے اور احتجاج مزید زور پکڑتے جا رہے ہیں، مظاہرے کے دوران بم دھماکے سے چھتیس افراد زخمی ہوگئے۔

میڈیا رپورٹس کے مطابق بم دھماکا سے بھگدڑ مچ گئی، جس کے باعث متعدد مظاہرین کچلے جانے سے زخمی ہوگئے جبکہ بعض دھماکے کے باعث زخمی ہوئے۔

تھائی لینڈ میں حکومت مخالف مظاہرے کئی دنوں سے بینکاک کی سڑکوں پرجاری ہیں، تھائی لینڈ کی نگراں وزیراعظم کی برطرفی کے خلاف مظاہرے کرنے والےمظاہرین کا کہنا ہے کہ وزیراعظم کے مستعفی ہونے تک وہ احتجاج جاری رکھیں گے۔

یاد رہے کہ اس سے قبل تھائی لینڈ کے فوجی سربراہ ہنگامے ختم نہ ہونے پر فوجی بغاوت کا عندیہ بھی دے چکے ہیں۔
    
       

امریکی ایجنسیوں کے غیر قانونی اقدامات کو قانونی شکل دے دی گئی، امریکی خفیہ ادارے دوسرے ملکوں کی حکومتوں کے راز جاننے کے لیے اپنی سرگرمیاں بدستور جاری رکھیں گے اور اس عمل پر کسی سے معافی نہیں مانگی جائے گی۔

امریکہ کے صدر باراک اوباما نے امریکی انٹیلی جنس اداروں کی جانب سے اندرون و بیرون ملک جاری نگرانی اور جاسوسی کے پروگراموں میں کئی اصلاحات متعارف کرانے کا اعلان کیا ہے۔

واشنگٹن میں خطاب کرتے ہوئے صدر اوباما نے امریکی خفیہ اداروں کی جانب سے امریکہ کے دوست اور اتحادی ممالک کے سربراہان کی جاسوسی پر پابندی عائد کرنے کا اعلان کرتے ہوئے کہا کہ خفیہ معلومات نے دنیا بھر میں دہشت گرد حملوں کی روک تھام میں مدد دی ہے لہذا اسے مکمل طور پر بند نہیں کیا جاسکتا لیکن دوست ممالک کے سربراہان کو یقین دلاتا ہوں کہ ان کی جاسوسی نہیں کی جائیگی۔

امریکی ایجنسیوں کے غیر قانونی اقدامات کو قانونی شکل دیتے ہوئے ان کا کہنا تھا کہ ہر اس شخص پر نظر رکھی جائیگی جو امریکہ کے لئے خطرہ ہے جکہ عام افراد کی جاسوسی نہیں کی جائیگی، یاد رہے کہ گزشتہ سال سابق امریکی خفیہ اہلکار ایڈورڈ سنوڈن خفیہ معلومات کا بڑا ذخیرہ لے کر امریکہ سے فرار ہوگئے تھے، جس کے افشا کیے جانے کے بعد امریکہ کو دنیا بھر سے شدید ردعمل کا سامنا کرنا پڑا تھا۔
   

امریکی وزیر خارجہ جان کیری کا کہنا ہے کہ شام کے مستقبل میں بشارالاسد کے لیے کوئی جگہ نہیں، امریکہ کے پاس بشارالاسد پر دباؤ ڈالنے کے تمام اختیارات موجود ہیں۔

واشنگٹن میں میکسیکو اور کینیڈا کے وزرا سے ملاقات کے بعد نیوز بریفنگ دیتے ہوئے جان کیری کا کہنا تھا کہ آئندہ جنیوا میں ہونے مذاکرات سے واضح ہوجائے گا کہ شام میں جاری خانہ جنگی اور حکومت کی منتقلی کا سیاسی حل موجود ہے یا نہیں۔

جان کیری نے تنبیہ کرتے ہوئے کہا کہ بشارالاسد نے مذاکرات میں حکومت کی منتقلی پرنظر ثانی نہیں کی تو انہیں شام کی قیادت کا حق نہیں دیا جائے، جان کیری شام کے تنازعے کے حل کے لیے آئندہ جنیوا میں ہونے والے مذاکرات کی سربراہی کریں گے۔
    
   

بھارت نے کہا ہے کہ طالبان افغانستان میں صدارتی انتخابی عمل کو سبوتاژ کرنے کی منصوبہ بندی کررہے ہیں۔

نئی دہلی میں بھارتی خارجہ سیکریٹری سوجات سنگھ نے پریس کانفرنس کرتے ہوئے کہا کہ رواں سال افغانستان میں صدارتی انتخابی عمل خون ریز ہوسکتا ہے کیونکہ طالبان صدارتی انتخاب کو سبوتاژ کرنے کی منصوبہ بندی کررہے ہیں۔

انہوں نے خدشہ ظاہر کیا کہ افغانستان سے امریکی افواج کے انخلا کے بعد افغان حکومت انتہا پسندوں کے سامنے بے بس ہوسکتی ہے، ان کا مزید کہنا تھا کہ افغانستان میں قیام امن اور استحکام کے لیے پڑوسی ملک کو انتہا پسندوں کی پشت پناہی دستبردار ہونا پڑیگا۔
   

جنوبی سوڈان کے وزیر دفاع کا کہنا ہے کہ باغی گروہ کے سربراہوں کا جنگجوؤں پر کنٹرول نہیں ہے، جس کے باعث امن مذاکرات کی کامیابی نا ممکن ہے۔

جنوبی سوڈان کے وزیر دفاع کا کہنا تھا کہ باغی گروہوں کا ملک کے دو قصبوں پر کنٹرول ہے جو کہ تیل کی آ مدورفت کے حوالے سے نہایت اہم ہیں۔

وزیر دفاع کا مزید کہنا تھا کہ باغی گروہ کے سربراہوں کا جنگجوؤں پر مکمل کنٹرول نہیں ہے، جس کے باعث امن مذاکرات کی کامیابی مشکل ہورہی ہے، دوسری جانب متحارب باغی گروہوں کا موقف ہے کہ وہ اپنے اپنے علاقوں پر تسلط برقرار رکھیں گے۔

یاد رہے کہ نوزائیدہ ملک جنوبی سوڈان سن دوہزار گیارہ میں اپنی تخلیق کے بعد سے ہی مختلف مسائل کا شکار ہے اور وسط دسمبر سے جاری خانہ جنگی میں ابتک ہزاروں انسان لقمہ اجل بن چکے ہیں۔

یوکرائن میں جاری حکومت مخالف مظاہروں کو روکنے کے لئے یوکرائن کی پارلیمنٹ نے قانون منظور کرلیا۔

غیرملکی خبر ایجنسی کے مطابق اس قانون کے تحت بیرون ملک سے مالی مدد حاصل کرنے والی غیر سرکاری تظیمیں سیاسی سرگرمیوں میں حصہ نہیں لے سکیں گی، قانون پر عمل نہ کرنے پر انہیں غیر ملکی ایجنٹ بھی قرار دیا جاسکتا ہے۔

اس قانون کی منظوری پر اپوزیشن نے سخت ردعمل ظاہر کیا تھا، اس قانون کی منظوری کے لئے ابھی صدر کے دستخط باقی ہیں، یاد رہے کہ اس سے قبل یوکرائن کی پارلیمنٹ نے حکومت مخالف مظاہروں کے دوران پولیس کے ساتھ جھڑپوں میں گرفتار ہونے والے مظاہرین کی سزا معاف کرنے پراتفاق کیا تھا۔
   

برازیل میں آسمانی بجلی گرنے سے مقدس مورتی کو نقصان پہنچے پرعوام خوفزدہ ہے،  حکومت سے مورتی کی مرمت کا مطالبہ کردیا۔

غیر ملکی خبر ایجنسی کی رپورٹ کے مطابق برازیل کے دارلحکومت ریوڈی جنیرو کے پہاڑ پر نصب دیوقامت تاریخی مقدس مورتی پر آسمانی بجلی گرنے سے مورتی کے ہاتھ اور جسم پر نشانات پڑ گئے ہیں۔

دوسری جانب برازیلین حکومت نے موسمیاتی خرابی کے باعث مورتی کی مرمت آئندہ ماہ کرانے کا اعلان کیا ہے، جس پر شہریوں میں سخت غم و غصہ پایا جاتا ہے ، یاد رہے کہ برازیلین اپنے عقیدے کے تحت اس مورتی کو مقدس سمجھتے ہیں اور مورتی پر آسمانی بجلی گرنے سے خوف وہراس میں مبتلا ہیں۔