پیرو حکام کے مطابق دارالحکومت لیما کے پہاڑی علاقے میں ایک بس کھائی میں جاگری، حادثے کے نتیجے میں پندرہ افراد ہلاک اور اٹھاون زخمی ہوگئے۔
غیر ملکی خبر رساں ادارے کے مطابق بس تیز رفتاری کے باعث دوسومیٹر گہری کھائی میں گری، ریسکیو ذرائع کا کہنا ہے کہ بس موڑ کھاتے ہوئے پہاڑ سے نیچے گری، جس کے نتیجے میں ہلاکتیں زیادہ ہوئیں۔
زخمیوں کو مقامی اسپتال پہنچایا گیا، حادثے کی وجوہات کا تاحال علم نہیں ہوسکا، تاہم بچ جانے والے مسافروں نے بس ڈرائیور کی لاپرواہی اور تیزرفتاری کواس حادثے کا ذمہ دار قرار دیا۔
پاکستان کے زرمبادلہ کے ذخائر میں چھیالیس کروڑ ساٹھ لاکھ ڈالرز کا اضافہ ہو گیا ہے۔ مرکزی بینک کے مطابق اس اضافے سے تیرہ دسمبر کو ختم ہونے والے ہفتے تک ملکی زرمبادلہ کے ذخائرکی مجموعی مالیت آٹھ ارب 52 کروڑ63 لاکھ ڈالرہوگئی ہے۔
بینکنگ ذرائع کے مطابق زرمبادلہ کے ذخائر میں اضافہ عالمی اداروں سے قرض اورامداد کی مد میں ملنے والے ڈالرز کے باعث ہوا۔
جبکہ جلد ہی آئی ایم ایف سےقرض کی دوسری قسط 55 کروڑڈالربھی مل جائیں گے، ادھراسٹیٹ بینک نے قرض پر سود اوردرآمدات کیلئے گذشتہ ہفتے زرمبادلہ کے ذخائر سے دس کروڑ ڈالر کی ادائیگی بھی کی ہے۔
آسٹریلیا کے شہر سڈنی میں بم کی اطلاع کے بعد پارلیمنٹ آنے جانے والے تمام راستے سیل کردئیے گئے۔
غیرملکی میڈیا رپورٹس کے مطابق نیوساؤتھ ویلزمیں بم کی اطلاع پر پارلیمنٹ کو بند کرکے پولیس نے سرچ آپریشن شروع کردیا ہے جبکہ اطلاعات کے مطابق سرچ آپریشن کے باعث پارلیمنٹ ہائوس کی عمارت خالی کرالی گئی اور لوگوں کو کسی بھی قسم کی نقل و حرکت سے روک دیا گیا ہے۔
آخری اطلاعات آنے تک پولیس اور بم ڈسپوزل اسکواڈ کا عملہ بم کی تلاش میں مصروف تھے۔
ہیملٹن ٹیسٹ میں ویسٹ انڈیز کی ٹیم پہلی اننگز میں تین سو سرسٹھ رنزبناکر آؤٹ ہوگئی۔ نیوزی لینڈ نے تین وکٹوں پر ایک سو چھپن رنز بنالئے۔
ہیملٹن میں کھیلے جانے والے ٹیسٹ کے دوسرے روز ویسٹ انڈیز نے پہلی نامکمل اننگز دو سو نواسی رنز چھ کھلاڑی آؤٹ پر دوبارہ شروع کی اور اٹھتر رنز کے اضافے کے بعد پوری ٹیم تین سو سرسٹھ رنزبناکر آؤٹ ہوگئی۔
چندرپال نے ایک سو بائیس رنز کی ناقابل شکست اننگز کھیلی، ٹم ساؤتھے نے چار اور اینڈرسن نے تین کھلاڑیوں کو آؤٹ کیا۔ جواب میں نیوزی لینڈ نے کھیل کے اختتام تک تین وکٹوں پر ایک سو چھپن رنز بنالئے ہیں۔
پشاور کے علاقے اعجاز آباد میں مکان کے باہر نصب بارودی مواد زوردار دھماکہ سے کئی عمارتوں اور دکانوں کے شیشے ٹوٹ گئے۔
پولیس ذرائع کے مطابق نامعلوم افراد مکان کے باہر بارودی مواد رکھ کر فرار ہوگئے تھے، جس کے بعد بارودی مواد زور دار دھماکے سے پھٹ گیا، دھماکے کی وجہ سے مکان اور قریبی عمارتوں کے شیشے ٹوٹ گئے جبکہ مکان کو جزوی نقصان پہنچا۔
پولیس کے مطابق بارودی مواد ایک سے ڈیڑھ کلو تھا، پولیس نے تھانہ گلبہار میں نامعلوم افراد کیخلاف مقدمہ درج کرکے ملزمان کی تلاش شروع کردی ہے۔
کراچی کے علاقے صدر میں واقع پنوراما سینٹر میں آگ لگ گئی، جس پر فائر بریگیڈ نے ایک گھنٹے کی جدو جہد کے بعدقابو پالیا۔
صدر میں واقع پنوراما سینٹر کی چوتھی منزل پر اچانک آگ بھڑک اٹھی، آگ بجھانے کیلئے فوری طور پرفائر برگیڈ کو طلب کیا گیا، فائر بریگیڈ حکام نے پہلے فائر ٹینڈر سے آگ پر قابو پانے کی کوشش کی تاہم پانی کے پائپ خراب ہونے کی وجہ اسنارکل کو طلب کیا گیا۔
آگ کی شدت دیکھتے ہوئے عمارت کو فوری طور پر خالی کرالیا گیا، فائر آفیسر امتیاز کے مطابق پانچ فائر ٹینڈر اور ایک اسنارکل نے ایک گھنٹے کی جدوجہد کے بعد آگ پر قابو پالیا، انہوں نے بتایا کہ آگ لگنے کی وجہ ابتدائی طور پر شارٹ سرکٹ لگتی ہے۔
انہوں نے بتایا کہ آگ سے کوئی زخمی نہیں ہوا ہے، آگ سے دکانوں اور دفاتر کو نقصان پہنچا۔
الیکشن ٹریبونل نے حلقہ پی کے اکیاسی سوات کے بائیس پولنگ اسٹیشنز پر دوبارہ پولنگ کا حکم دے دیا۔
عام انتخابات میں حلقہ پی کے اکیاسی سے تحریک انصاف کے عزیزاللہ کو کامیاب قرار دیا گیا تھا، جس کے بعد مخالف امیدوار جے یو آئی کے حبیب اللہ نے حلقے میں دھاندلی کا الزام عائد کیا تھا۔
الیکشن ٹریبونل نے آج فیصلہ سناتے ہوئے پی کے اکیاسی کے بائیس پولنگ اسٹیشنز پر دوبار پولنگ کا حکم دیا ہے۔
اسلام آباد ہائی کورٹ نے پنجاب میں سی این جی پالیسی معطل کرتے ہوئے پوٹھوہار ریجن میں سابقہ شیڈول کے مطابق اسٹیشنز کھولنے کا حکم دے دیا، فیصلے کا اطلاق عدالت سے رجوع کرنے والے ستتر سی این جی اسٹیشنز پر ہوگا۔
سی این جی مالکان کی جانب سے اسلام آباد ہائی کورٹ میں دائر درخواستوں کی سماعت جسٹس شوکت عزیز صدیقی نے کی، درخواست گزاروں کے وکیل قمر افضل ایڈوکیٹ نے دلائل دیتے ہوئے کہا کہ حکومت کے جاری کردہ نئے شیڈول سے سی این جی مالکان کو نقصا ن ہورہا ہے۔
جسٹس شوکت عزیز صدیقی نے حکومت کے جاری کردہ شیڈول کو معطل کر تے ہوئے پرانے شیڈول کو بحال کرنے کا حکم دیا، کیس کی سماعت فروری کے تیسرے ہفتے تک ملتوی کر دی گئی ہے۔
آل پاکستان سی این جی ایسوسی ایشن کے سپریم کونسل کے چیئرمین غیاث پراچہ کے مطابق سوئی نادرن گیس کی قلت کا بہانہ بنا کر قوم کو دھوکہ دے رہی ہے، سی این جی کی بندش سے ہزاروں لوگ کا روزگار خطرے میں پڑ جائے گا۔
اکاؤنٹنٹ جنرل طاہر محمود نے اپنی برطرفی کو اسلام آباد ہائی کورٹ میں چیلنج کر دیا۔
درخواست میں سیکرٹری خزانہ ، اسٹیبلشمنٹ ڈویژن اور دیگر کو فریق بنایا گیا ہے جبکہ آج ہی کیس کی سماعت کی استدعا بھی کی گئی ہے، ایک دوسرے مقدمے میں اسلام آباد ہائی کورٹ نے چیئرمین پیمرا کی درخواست پر قائمقام چیئرمین سمیت دیگر فریقین کو نوٹس جاری کر دیا۔
درخواست گزار کے وکیل وسیم سجاد نے موقف اختیارکیا کہ عدالتی حکم کی مسلسل خلاف ورزی کی جا رہی ہے، قائمقام چیئرمین ہائی کورٹ کے حکم کو ماننے سے انکاری ہیں۔
دفترخارجہ نے کہا ہے کہ بنگلہ دیش کو ماضی کو بھول کر آگے بڑھنا چاہیئے، عراق میں ہونے والے بس حملے میں کوئی پاکستانی ہلاک نہیں ہوا۔
ہفتہ وار پریس بریفنگ کے دوران ترجمان دفتر خارجہ تسنیم اسلم نے کہا کہ امید ہے بنگلہ دیش انیس سو چوہترکے معاہدے کے تحت مفاہمت کی پالیسی اپنائے گا، پاکستان کی پارلیمنٹ میں ایک خود مختار ادارہ ہے، پارلیمنٹ میں بنگلہ دیش میں جماعت اسلامی کے لیڈر کو پھانسی دیئے جانے کی مذمتی قرارداد یہ جذبہ ظاہر کرتا ہے کہ بنگلہ دیش کو ماضی کو بھول کر آگے بڑھنا چاہیے۔
پاکستان کی امداد کو نیٹو سپلائی سے مشروط کرنے پر میڈیا کی رپورٹ سے متعلق ترجمان نے کہا کہ امریکا نے اس بارے میں آگاہ نہیں کیا، پاکستان کسی قسم کی شرائط قبول نہیں کرے گا، پاکستان نے بے پناہ قربانیاں دی ہیں اور پاکستان کی نیت پر شک نہیں کیا جانا چاہیے، ترجمان نے کہا کہ عراق میں ہونے والے بس حملے میں کوئی پاکستانی ہلاک نہیں ہوا۔
ترجمان کا کہنا تھا پاک بھارت ڈی جی ایم اوز 24 دسمبر کو ملاقات کرینگے، پاکستان نے تجویز دی تھی کہ ملاقات میں دفتر خارجہ کے حکام بھی شامل ہوں لیکن انہوں نے یہ تجویز نہیں مانی۔
