سابق سیکریٹری خارجہ اور امریکہ کیلئے نامزد پاکستانی سفیر جلیل عباس جیلانی آج امریکہ پہنچ رہے ہیں۔
ذرائع کے مطابق سابق سیکریٹری خارجہ جلیل عباس جیلانی امریکہ پہنچ کرامریکی صدر باراک اوباما جوکہ ان دنوں تعطیلات پر ہیں انکو اپنے سفارتی دستاویزات پیش کرینگے، جس کے بعد باقاعدہ طور پر وہ یکم جنوری سے اپنی سفارتی ذمہ داریاں سنبھالیں سکیں گے۔
کراچی کے علاقے نارتھ ناظم آباد میں سماجی کارکن انصار برنی کے گھر کے باہرنامعلوم کار سواروں کی جانب سے ہوائی فائرنگ کی گئی۔
سماجی کارکن انصار برنی کا فائرنگ کی تصدیق کرتے ہوئے کہنا تھا کہ میرے گھر کے باہر فائرنگ کی گئی ہے اور حملہ آور کار میں سوار تھے، انصار برنی کا مزید کہنا تھا کہ انہیں پہلے بھی دھمکیاں دی گئی ہیں۔
ذرائع کے مطابق فائرنگ کے وقت انصار برنی اپنی رہائش گاہ میں موجود تھے جبکہ وہ گزشتہ روز ہی لاہور سے کراچی واپس آئے تھے، انصار برنی کے مطابق پہلے بھی دھمکیاں ملتی رہیں، وہ دھمکیوں سے ڈرنے والے نہیں اور نہ ہی سماجی کام روکیں گے، انسانیت کیلئے ہر قربانی دینے کو تیار ہیں۔
لاہور میں گتے اور فوم بنانے والی فیکٹری میں آگ لگ گئی، جس کے باعث دو سکیورٹی گارڈز جھلس کر جاں بحق ہوگئے۔
پولیس کے مطابق لاہور میں قائد اعظم انڈسٹریل اسٹیٹ کوٹ لکھپت میں واقع ایک فیکٹری میں رات گئے اچانک آگ بھڑک اٹھی، جس نے دیکھتے ہی دیکھتے فیکٹری کے بڑے حصے کو اپنی لپیٹ میں لے لیا، ڈیوٹی پر موجود دوسکیورٹی گارڈز نے ریسکیو کو اطلاع کرنے کے بعد آگ بجھانے کی کوشش کی، اس دوران دونوں بری طرح جھلس گئے۔
ریسکیو اہلکاروں نے عمران نامی سیکیورٹی گارڈ کو جناح ہسپتال جبکہ نذیر نامی سیکیورٹی گارڈ کو جنرل ہسپتال منتقل کیا لیکن دونوں جانبر نہ ہو سکے اور دم توڑ گئے، ریسکیو اہلکاروں نے دو گھنٹے کی جدو جہد کے بعد آگ پر قابو پالیا، ہلاک ہونے والے دونوں سکیورٹی گارڈز کی لاشیں پوسٹ مارٹم کے لئے مردہ خانے منتقل کر دی گئی ہیں۔
آگ لگنے سے لاکھوں روپے مالیت کا سامان جل کر خاکستر ہوگیا، ریسکیو ذرائع کے مطابق ابتدائی تحقیقات کے مطابق آگ گیس ہیٹر کی وجہ سے لگی، پولیس نے کچھ ملازمین کو بھی تفتیش کے لئے حراست میں لے لیا ہے۔
یمن میں امن و امان کی صورتحال بدستور کشیدہ فوجی ٹینک کی شیلنگ سے تین بچوں سمیت سولہ افراد ہلاک درجنوں زخمی ہوگئے۔
یمنی فوج کی جانب سے شیلنگ سیکورٹی فورسز کے ساتھ جھڑپ میں ہلاک ہونے والے افراد کے تعزیتی کیمپ پر کی گئی، فوجی حکام کا کہنا ہے کہ علیحدگی پسند گروپ کی جانب سے کیمپ کی اطلاع پر کاروائی کی گئی۔
جنوبی یمن میں علیحدگی پسند گروپوں کی کاروائیاں جاری ہیں، اس سے قبل باغیوں کی جانب سے گورنر ہاوس پر حملے میں پولیس افسر سمیت تین افراد ہلاک ہوئے تھے۔
جس کے بعد یمنی فوج نے کاروائیاں تیز کردی ہیں۔تاہم فوج کی شیلنگ سے سولہ بے گناہ شہریوں کی ہلاکت کے بعد صورتحال مزید پیچیدہ ہونے کا امکان ہے
امریکہ کی وفاقی عدالت نے جاسوسی پروگرام کا فیصلہ سناتے ہوئے کہا ہے کہ شہریوں کی فون کالز کی نگرانی قانون کی خلاف ورزی نہیں ہے۔
امریکہ کے خفیہ ادارے کی جانب سے امریکی عوام کی فون کالز کی نگرانی پرسول لیبرٹی یونین نے خفیہ ادارے کے سربراہ جیمس کلیپر کے خلاف مقدمہ دائر کیا تھا۔
وفاقی عدالت کے جج کا کہنا تھا کہ ادارے کی طرف سےعوام کا ٹیلی فون ریکارڈ کسی غیر قانونی کاروائی میں استعمال ہونے کے شواہد نہیں ملے ہیں۔
ٹیلی فون نگرانی کا مقصد تفشیشی عمل میں مدد اور ممکنہ دہشت گردی کے حملوں سے بچاؤ ہے، جس کی بنا پروگرام کو قانونی قرار نہیں دیا جاسکتا، مقدمہ دائر کرنے والی تنظیم نےعدالتی فیصلے پرمایوسی کا اظہار کیا ہے۔
امریکا میں بے روزگار افراد کو مالی اعانت کا پروگرام ختم ہونے کا خدشہ پیدا ہوگیا ہے، مستفیض ہونے والے دس لاکھ سے زائد افراد کا مستقبل داؤ پر لگ گیا ہے، دوسری جانب امریکی صدر اوباما نے ڈیموکریٹس اور ری پبلکن رہنماؤں سے اپیل کی ہےکہ پروگرام کو ہرصورت میں جاری رکھا جائے۔
امریکا میں خراب معاشی صورتحال کے باعث بے روزگار افراد کی مالی مدد کا پروگرام ختم ہونے کا خطرہ پیدا ہوگیا ہے، مالی اعانت کے اس پروگرام کے ختم ہونے سے امریکا بھر میں دس لاکھ سے زائد افراد متاثر ہوں گے۔
یاد رہے کہ امریکی شہریت کے حامل ہر بے روزگار فرد کو حکومت کی جانب سے مالی اعانت کے طور پر ایک ہزار ایک سو چھیاسٹھ ڈالر ماہانہ ادا کئے جاتے ہیں جو کہ اسے برسر روزگار ہونے تک ملتے رہتے ہیں۔
تاہم امریکی صدر باراک اوباما اس پروگرام کو ہر حال میں جاری رکھنے کے خواہش مند ہیں اور اس مقصد کے لئے انہوں نے ری پبلکن اور ڈیموکریٹس دونوں جماعتوں کے رہ نماؤں سے اپیل کی ہے کہ بے روزگاری سے متاثرہ افراد کے مالی اعانت کے پروگرام کو جاری رکھنے کی ہر ممکن کوشش کی جائے۔
ترکی میں کرپشن کے الزامات میں وفاقی وزراء کے ملوث اور مستعفی ہونے کے بعد پیدا ہونے والے سیاسی بحران میں شدت آرہی ہے، استنبول میں لاکھوں افراد حکومت کے خلاف مظاہرے کر رہے ہیں اور مستعفی ہونے کا مطالبہ کر رہے ہیں۔
ترکی میں سیاسی بحران اس وقت سامنے آیا تھا جب کرپشن کے الزامات میں ملوث ہونے پر تین وفاقی وزراء مستعفی ہوگئے تھے، دوسری جانب ترک عوام کا وزیراعظم اردگان سے استعفے کا مطالبہ زور پکڑتا جارہاہے۔
استنبول کے لاکھوں شہریوں نے ہونے والے حکومت مخالف مظاہرے میں بڑی تعداد میں شرکت کی اور وزیراعظم سے استعفی کا مطالبہ کیا، تاہم وزیراعظم کا کہنا ہے کہ جبتک عوام انکے ساتھ ہیں وہ اقتدار کی کرسی پر براجمان رہیں گے۔
اے آروائی نیوز کے پروگرام سوال یہ میں گفتگو کرتےپہوئے سابق صدرجنرل ریٹائرڈ جنرل پرویزمشرف کاکہناتھا مقدمے میں سزا ہوئی تو معلوم نہیں کیاکروں گاالبتہ معافی مانگنے کاعادی نہیں۔
سابق صدرپرویزمشرف کاکہناہے حکومت چلاناوزیراعظم کی ذمہ داری ہے صدر کی نہیں،مقدمات صرف میرےخلاف بنائےگئے،انصاف کی دھجیاں اڑائی گئیں، امید ہے آگے انصاف ہوگا۔
کبھی سیاسی انتقام پریقین نہیں رکھا، پرویزمشرف کاکہناتھا مجھے الیکشن نہیں لڑنے دیاگیا قومی اسمبلی میں بیٹھے سب افراد صادق اورامین ہیں صرف میں ہی نہیں۔
ایک سوال کے جواب میں پرویزمشرف کاکہناتھالال مسجد اوربگٹی قتل کے مقدمات کئی سال بعدقائم کیے گئے ہیں حالانکہ حکومت چلانا وزیراعظم کاکام ہے نہ کہ صدرکا، پرویزمشرف کاکہناتھا اب تک انصاف کی دھجیاں اڑائیں گئیں، امیدکرتاہوں کہ میرے ساتھ اب آگے انصاف ہو گا،ان کاکہناتھا افتخارمحمدچوہدری کوجب سپریم کورٹ نے بحال کیاتومیں قبول کیا لیکن افتخارمحمدچوہدری نے انصاف نہیں دیا۔
سری لنکا نے پاکستان کو سنسنی خیز مقابلے کے بعد 2 وکٹوں سے شکست دے دی، پاکستان کرکٹ ٹیم پانچویں اور آخری ون ڈے میچ میں سری لنکا کو شکست نہ دے سکی، سری لنکنز دو وکٹوں سے کامیاب رہے، لیکن سیریز تین دو سے گرین شرٹس نے جیتی ہے۔
پاکستان نے ٹاس جیت کر بیٹنگ کا فیصلہ کیا۔ احمد شہزاد،شرجیل خان اور صہیب مقصود جلد آؤٹ ہوگئے۔ ان فارم بیٹسمین محمد حفیظ سے ایک اور سنچری کی امید تھی،بدقسمتی سے وہ اکتالیس رنز بنا کر پویلین لوٹ گئے۔ مصباح الحق نے ذمہ داری سے کھیلتے ہوئے ٹیم کا اسکور بڑھایا اور اکیاون رنز کی اننگز کھیلی۔ عمراکمل بیس رنز پر ہمت ہار گئے۔
ایک سو چھتر رنز پر سات کھلاڑیوں کے آؤٹ ہوجانے کے بعد انور علی نے ٹیم کی ڈوبتی ناؤ کو پار لگانے کی کوشش کی، مگر انکا ساتھ دینے والے جلد وکٹیں گنوا بیٹھے، قومی ٹیم دو سو بتیس رنز بنا کر آؤٹ ہوگئی، انور علی نے ناقابل شکست اکتالیس کی اننگز کھیلی۔ لاستھ ملنگا نے چارکھلاڑیوں کو پویلین کی راہ دکھائی، سری لنکن اوپنرز نے عمدہ آغاز فراہم کیا۔
پریرا سینتالیس اور دلشن پینتالیس رنز بناکر آؤٹ کیا ہوئے۔۔ سری لنکن ٹیم کی وکٹیں گرنا شروع ہوگئی۔۔ چندی مل پاکستان کی کامیابی میں رکاوٹ بنے رہے، سنسنی خیز مقابلے کے بعد چھ گیندوں پر تین رنز درکار ہیں، اجنتامینڈس نے گیند کو باؤنڈری پار پہنچا دیا اور سری لنکا دو وکٹوں سے کامیاب ہوگیا، جنید خان نے تین، سعید اجمل نے دو وکٹیں حاصل کیں۔
سابق صدر اورملزم پرویزمشرف پرغداری کے مقدمے میں یکم جنوری کوفردجرم عائد ہوگی۔ خصوصی عدالت نے تحریری حکم نامہ جاری کردیا۔
تین صفحات پرمشتمل اس حکم نامے پرتین ججز کے دستخط موجود ہیں۔ حکم نامے میں کہا گیا ہے کہ ملزم کوسمن جاری کئے گئے لیکن وہ حاضر نہیں ہوا۔
مشرف کے وکلاء نے خصوصی عدالت کے سامنے موقف اختیارکیا کہ وفاقی حکومت کی طرف سے مناسب سکیورٹی کے انتظامات ہونے تک مشرف عدالت میں حاضر نہیں ہوسکتے۔
انھوں نے درخواست کی کہ مشرف کوحاضری سے مستثنی قراردیا جائے جس پرعدالت نے کہا کہ ملزم کاکیس ناقابل ضمانت ہے پہلے انھیں ضمانت لینی ہوگی۔
ملزم کی جانب سے پیش کی جانیوالی درخواست میں کوئی خاص وجہ نہیں پیش کی جاسکی ملزم کوایک دن کیلئےاستثنی دیا جاچکاہےاورآئندہ سماعت پرملزم کوعدالت حاضر ہوناہوگا۔
حکم نامے میں وفاقی حکومت کو کہاگیا ہے کہ وہ ملزم کی عدالت میں حاضری کویقینی بنانے کیلئے تمام سکیورٹی اقدامات کرے۔
