وزیراعظم پاکستان کی صاحبزادی مریم نواز سب کو پیچھے چھوڑتے ہوئے انٹرنیٹ پر سرچ کی جانے والی پاکستانی شخصیات میں سرفہرست ہوگئی ہیں۔
ذرائع کے مطابق گوگل سرچ انجن رینکنگ میں مریم نواز نیلسن منڈیلا کے بعد سرچ کی جانے والی خاتون بن گئی ہیں، رینکنگ میں نیلسن منڈیلا تیسرے نمبر پر ہیں اور مریم نواز چوتھے نمبر پر ہیں۔
ذرائع نے یہ بھی بتایا کہ انٹرنیٹ استعمال کرنے والوں میں زیادہ تعداد نوجوانوں کی ہے اس رینکنگ میں ایم کیوایم کے قائد الطاف حسین اور مشہور گلوکار عاطف اسلم کی اہلیہ بھی شامل ہیں۔
دی گریٹ ٹرین رابری کا ہیرو رونی بگز چوراسی سال کی عمر میں شمالی لندن میں اپنے گھر میں انتقال کرگئے۔
رونی بگز نے اپنے ساتھیوں کی مدد سے آٹھ اگست انیس سو تریسٹھ کو ایک شاہی ٹرین سے دو اعشاریہ چھ ملین پاونڈز چرائے، جو آج تقریبا چالیس ملین پاونڈز کے مساوی ہے، یہ واردات گریٹ ٹرین کے نام سے مشہور ہوئی، جس پر دنیا بھر میں کئی مشہور فلمیں بھی بنیں۔
رونی بگز کو اس واردات پرسزا ہوئی تاہم وہ آٹھ جون انیس سو پینسٹھ کو جیل سے فرارہونے میں کامیاب ہوگیا اور برازیل پہنچ گیا، جہاں وہ تیس برس رہے دو ہزار ایک میں واپس آکرخود کو پولیس کے حوالے کر دیا تاہم دو ہزار نو میں خرابی صحت کی وجہ سے رہا کر دیا گیا تھا۔
پاکستان نے سری لنکا کو پہلے ون ڈے میں باآسانی 11 رنز سے شکست دے دی، شاندار سنچری پر پاکستان کے محمد حفیظ کو میچ کے بہترین کھلاڑی کا ایوارڈ دیا گیا۔
شارجہ کے تاریخی میدان میں پاکستانی بلے باز سری لنکن ٹائیگرز پر جم کر برسے، ٹاس جیت کر مصباح نے بیٹنگ کا فیصلہ کیا، پہلا میچ کھیلنے والے شرجیل خان نے جارحانہ بیٹنگ کرتے ہوئے کیرئیر کی پہلی ففٹی بنائی،شرجیل خان اکسٹھ رنز بناکر آؤٹ ہوئے، نوجوان صہیب مقصود اور محمد حفیظ سری لنکن بولرز کے سامنے ڈٹے رہے، صہیب مقصود اکہتر رنز پر رن آؤٹ ہوگئے، پروفیسر نے پروفیسری دکھاتے ہوئے شاندار سنچری بنائی۔
بوم بوم آفریدی نے بھی لنکن ٹائیگرز پر ہاتھ صاف کرتے ہوئے جم کر پٹائی کی اور صرف بارہ گیندوں پر برق رفتاری سے کھیلتے ہوئے چونتیس رنز بنائے، تین سو تئیس رنز کے پہاڑ جیسے ہدف کے تعاقب میں سری لنکا کا آغاز کو پر اعتماد رہا، لیکن دلشان کے آؤٹ ہوتے ہوئے پاکستانی بولرز نے سری لنکا کے گرد گھیرا تنگ کردیا، یکے بعد دیگر ے وکٹیں گرنے سے مہمان ٹیم کی مشکلات میں اضافہ ہوگیا، محمد حفیظ کو آل راؤنڈ کھیل پیش کرنے پر میچ کے بہترین کھلاڑی کا ایوارڈ دیا گیا۔
۔چیئرمین پیمراکی بحالی فیصلے کے خلاف اپیل وزارت اطلاعات اور سیکریٹری اسٹیبلشمنٹ کی جانب سے حافظ ایس اے رحمان ایڈوکیٹ نے دائر کی۔
جس میں کہا گیا ہے کہ چئیرمین پیمرا کا تقرر ہی غیر قانونی تھا، ہائیکورٹ نے حکومت کا موقف نہیں سنا اور یکطرفہ طور پر بحالی کا حکم سنا دیا اور ہائیکورٹ نے نئے چئیرمین کے تقرر کانوٹیفکشن بھی منسوخ نہیں کیا۔
جس کی وجہ سے پیمرا کے بیک وقت دوچیئرمین ہوگئے ہیں، جو قانون کے مطابق نہیں ہے، اپیل میں چئیرمین پیمرا کی بحالی کا عبوری حکم معطل کرنے کی استدعا بھی کی گئی ہے ۔
بنگلہ دیش کی وزیر اعظم اور شیخ مجیب الرحمان کی بیٹی حسینہ واجد نے کہا ہے کہ پاکستان سے محبت کرنے والوں کے لئے بنگلہ دیش میں کوئی جگہ نہیں ہے۔
بنگلہ دیش میں عبد القادر ملا کی پھانسی کےخلاف پاکستان کی قومی اسمبلی میں قرار داد کی منظوری پر شیخ حسینہ واجد کاکہنا ہے کہ پاکستان نے ثابت کر دیا ہےکہ اس نے انیس سو اکہتر میں بنگلہ دیش کی جیت کو تسلیم نہیں کیا ہے۔
لندن سیکرٹریٹ میں رابطہ کمیٹی اور اراکین سے خطاب میں الطاف حسین کا کہنا تھا کہ پاکستان کو سنگین خطرات اور چیلنجز کا سامنا ہے ، حالات کا تقاضا ہے کہ پاکستان کو داخلی طور پر مضبوط کیا جائے، ان کا کہنا تھا کہ ملک اسی وقت مضبوط ہو گا جب نسلی اور لسانی اکائیوں کو ایک نظر سے دیکھا جائے اور چھوٹی قوموں کے احساس محرومی کو دور کیا جائے۔
محروم عوام کو حقوق دیئے بغیر قومی یکجحتی پیدا نہیں کی جاسکتی، ان کا کہنا تھا کہ تمام تر سازشوں اور پروپیگینڈوں کے باوجود عوام جانتی ہے کہ ان کی نجات دہندہ جماعت صرف ایم کیو ایم ہے ، کیونکہ متحدہ ہی ملک کو مضبوط اور مستحکم بنا سکتی ہے، الطاف حسین نے ارکان پارلیمنٹ پر زور دیا کہ وہ عوامی مسائل کو پارلیمنٹ میں اٹھائیں۔
پاکستان تحریک انصاف نےالیکشن کمیشن کو ایک اور خط لکھ دیا۔جس میں خیبر پختونخوامیں عدلیہ کے تحت بلدیاتی انتخابات کرانے کی درخواست کی گئی ہے۔
پاکستان تحریک انصاف نے خط میں چیف الیکشن کمشنر سے درخواست کی ہے کہ خیبر پختونخوا میں بلدیاتی انتخابات عدلیہ کے تحت کرانے کی درخواست کی گئی ہے۔ خط میں یہ استدعا بھی کی گئی کہ انتخابات بائیو میٹرک نظام کے تحت انتخابات کرائے جائیں اور شفاف الیکشن کےلئے ہر ممکن اقدامات ضروری ہیں۔
خیبر پختونخوا کے وزیر بلدیات عنایت اللہ کا کہنا ہے الیکشن کمیشن نے بائیو میٹرک سسٹم کے تحت بلدیاتی انتخابات کرانے پر رضامندی ظاہر کی ہے۔
صوبے میں بلدیاتی انتخابات کے لیے حلقہ بندیوں کا سلسلہ جاری ہے۔ الیکشن اپریل کے پہلے ہفتے میں کرائے جاسکتے ہیں۔ ان کا کہنا تھاعدلیہ کی نگرانی اور بائیو میٹرک سسٹم سے انتخابات کی ساکھ کو بہتر بنائیں گے۔
سندھ میں اٹھارہ جنوری کو ہونے والے بلدیاتی انتخابات کا شیڈول جاری کر دیا گیا ، کاغذات نامزدگی چھبیس سے انتیس دسمبر تک جمع کرائے جا سکیں گے۔
الیکشن کمیشن نے سندھ میں بلدیاتی انتخابات کا شیڈول جاری کر دیا ہے۔ شیڈول کے مطابق صوبے میں بلدیاتی انتخابات کیلئے پولنگ اٹھارہ جنوری کو ہو گی ، امیدوار کاغذات نامزدگی چھبیس سے انتیس دسمبر تک جمع کرا سکیں گے۔
کاغذات نامزدگی کی جانچ پڑتال کا عمل یکم سے پانچ جنوری تک مکمل کر لیا جائے گا۔ امیدوار بارہ جنوری کو کاغذات نامزدگی واپس لے سکیں گے جبکہ امیدواروں کی حتمی فہرست تیرہ جنوری کو جاری کی جائے گی۔
وزیراعظم کے مشیرخارجہ سرتاج عزیزکہتے ہیں امریکا اور ایران کے ساتھ تعلقات درست سمت میں جارہے ہیں، افغانستان کے ساتھ تعقات میں بہتری آئی، بھار ت کے ساتھ تعلقات بہترکرنا پہلی ترجیح ہے۔
سینیٹ کے اجلاس کے دوران وزیراعظم کے مشیرخارجہ سرتاج عزیز کاکہناتھا ڈرون حملوں میں انسانی حقو ق کاخیال رکھنے سے متعلق اقوام متحدہ کی جنرل اسمبلی میں ایک قراردارمنظور ہورہی ہے۔۔ڈرون حملوں کے حوالے سے ہمارے موقف کو تقویت ملے گی۔
سرتاج عزیز کاکہناتھا طالبان کا بذریعہ طاقت افغانستان پر قبضہ کرنا ہمارے مفاد میں نہیں، افغانستان میں کوئی گروپ ہمار ا فیورٹ نہیں پاور گیم میں پراکسی وار کسی کونہیں کرنے دیں گے، سرتاج عزیز کاکہناتھا بھارتی قیادت پر واضح کردیا کہ پاکستان مخالف جذبات ابھا رکرووٹ حاصل کیے گئے تو تعلقات بہتر نہیں ہوں گے۔۔ان کاکہناتھاکشمیر اور سیاچن کے معاملے پر بھارت سے بات چیت جاری ہے۔
سینیٹ میں اظہارخیال کرتے ہوئے سینیٹررضاربانی کاکہناتھا حکومت بنگلہ دیش میں ملا عبدالقادر کے حوالے سے پوزیشن واضح کرے، دفتر خارجہ اور وزیرداخلہ کے بیانات میں تضاد ہے، بتایا جائےدفتر خارجہ کا بیان درست ہے یا وزیرداخلہ کا۔
چوہدری نثار کےتحریک انصاف کےکردار کو تما شا کہنے پر اپوزیشن نے اجلاس سے بائیکاٹ کر دیا۔ چوہدری نثار نے تحریک انصاف کےپارلیمنٹ سےباہرکےکردار کو تما شا کہا۔
وفاقی وزیرداخلہ چوہدری نثار نے نادرا اور انگوٹھوں کے نشانات کی تصدیق کے سلگتے معاملے پر قومی اسمبلی میں وضاحت کی، ایوان میں خطاب میں وزیرداخلہ نے کہا نادرا قانونی طور پر وزارت داخلہ کا ماتحت ہے، نادرا کو الیکشن کمیشن کے ماتحت کرنے کی کوئی تجویز نہیں دی۔
چوہدری نثار کہتے ہیں ایک جماعت نے انگوٹھوں کی تصدیق کے معاملے پر تماشا لگا یا ہوا ہے، وزیرداخلہ نے کہا انگوٹھو ں کی تصدیق سے متعلق اپوزیشن جو چاہتی ہے اس کے لیے تیار ہیں۔
وزیرداخلہ نے کہا تحقیقات کی جائےمقناطیسی سیاہی ہرپولنگ اسٹیشن پرفراہم کی گئی،مقناطیسی سیاہی فراہم نہ کرنےوالوں کوکٹہرے میں لایاجائے، قومی اسمبلی میں خطاب کے دوران اپوزیشن لیڈر خورشید شاہ نے حکومت کو تنقید کا نشانہ بناتے ہوئے کہا کہ اپوزیشن مڈٹرم انتخابات نہیں چاہتی، ملک کے بڑے مسائل کا حل تلاش کیا جائے۔ اپوزیشن لیڈر کہتے ہیں مسائل کے حل کیلئے حکومت کی حمایت جاری رکھیں گے۔
