پہلگام فالس فیلگ آپریشن کے بعد مودی حکومت بوکھلاہٹ کا شکار ہے اب بھارت نے پاکستان کی خاتون اول آصفہ بھٹو کا ایکس اکاؤنٹ بھی بلاک کر دیا ہے۔
گزشتہ ماہ 22 اپریل کو پہلگام فالس فلیگ آپریشن کے فوری بعد بھارت کی جانب سے بغیر کسی ثبوت کے اس کا الزام پاکستان پر عائد کرنے اور سندھ طاس معاہدہ ختم کرنے کے بعد مودی حکومت کو دنیا بھر میں ہزیمت میں سامنا ہے اور اقوام عالم مودی سرکار کے جھوٹے پروپیگنڈے کا شکار نہیں ہو رہے ہیں۔
دنیا سے اپنے جھوٹے بیانیے کی پذیرائی نہ ملنے پر مودی سرکار بوکھلاہٹ کا شکار ہو کر اوچھے ہتھکنڈوں پر اتر آئی ہے اور اب بھارتی حکومت نے پاکستان کی خاتون اول آصفہ بھٹو کا ایکس اکاؤنٹ بھی بلاک کر دیا ہے۔
بھارت کے اس اقدام کی پاکستان پیپلز پارٹی پارلیمنٹرینز کی مرکزی ترجمان شازیہ مری نے شدید مذمت کرتے ہوئے کہا ہے کہ بھارت ریاستی دہشتگردی کے بعد اب سوشل میڈیا پر دہشتگردی میں مصروف ہے اور سوشل میڈیا اکاؤنٹس بلاک کرکے کھسیانی بلی کھمبا نوچے کی مثال پر گامزن ہے۔
شازیہ مری نے کہا کہ مودی نے سوشل میڈیا کو بھی بی جے پی کی طرح نفرت اور مظلوم کی آواز دبانےکا آلہ سمجھ لیا ہے لیکن پی پی کی قیادت بھارت کا اصل چہرہ دنیا کو دکھاتی رہے گی۔ وہ دن دور نہیں، جب مودی اپنےانجام کو پہنچےگا اور اس کے خلاف مقدمات عالمی عدالت میں چلیں گے۔
واضح رہے کہ پہلگام فالس فلیگ آپریشن کے بعد مودی سرکار کی بوکھلاہٹ کا اندازہ اس بات سے لگایا جا سکتا ہے کہ وہ پاکستانی وزیراعظم، آئی ایس پی آر، پی پی چیئرمین بلاول بھٹو مختلف شعبہ زندگی سے تعلق رکھنے والی اہم شخصیات، فنکاروں، کھلاڑیوں کے اکاؤنٹس، اے آر وائی سمیت مین اسٹریم میڈیا کے سوشل میڈیا اکاؤنٹس اور یو ٹیوب چینلز بند کر چکی ہے۔
