بھارت کی جانب سے جنگی جارحیت کے بعد چند ماہ قبل پاکستان کی تعریفوں کے پل باندھنے والے وکرانت گپتا اب پاکستان کرکٹ کیخلاف زہر اگلنے لگے۔
بھارت کی مودی سرکار پر جنگی جنون سوار ہے۔ پہلے اس نے رات کی تاریکی میں پاکستان کے شہروں پر حملہ کر کے معصوم شہریوں کو شہید کیا۔ پاک فوج کے بھرپور جواب کے بعد بھی وہ جنگی جارحیت سے باز نہ آئی اور ڈرون حملے کر پاکستان میں دراندازی کی کوشش کی لیکن پاکستان کی سیکیورٹی فورسز نے 25 سے زائد اسرائیلی ساختہ ڈرونز مار گرا کر اس کا یہ منصوبہ بھی ناکام بنا دیا۔
اس وقت جب دنیا جدید رافیل طیاروں سمیت بھارت کے پانچ جنگی طیاروں اور بھارتی چیک پوسٹوں کی تباہی کی داستان بیان کر رہی ہے۔ ایسے میں بھارتی شو بز اسٹارز کے ساتھ کرکٹرز اور صحافی اس کو اپنی جیت قرار دے کر اپنے ذہنی دیوالیہ پن کا ثبوت دے رہے اور مودی کا جنون مزید بڑھا رہے ہیں۔
بھارت کے اسپورٹس صحافی وکرانت گپتا جو حال ہی میں چیمپئنز ٹرافی کی کوریج کے لیے پاکستان آئے تھے اور پاکستانیوں کی میزبانی سے اتنا متاثر ہوئے تھے کہ اپنے ملک جا کر تعریفوں کے پل باندھے تھے۔
تاہم اب انہوں نے بھی ہوا کا رخ بدلتے دیکھ کر پاکستان کرکٹ کے خلاف زہر اگلنا شروع کر دیا ہے اور بھاری کرکٹ بورڈ کو ایشیا کپ سمیت آئی سی سی ایونٹس میں پاکستان کے میچز کے مکمل بائیکاٹ کا تباہ کن مشورہ دے رہے ہیں۔
اس سے قبل سنیل گواسکر نے بھی پہلگام فالس فلیگ آپریشن کے بعد شرمناک بیان دیتے ہوئے کہا تھا کہ وہ ایشیا کپ 2025 میں پاکستان کو کھیلتے ہوئے دیکھنا نہیں چاہتے۔
واضح رہے کہ پاکستان اور بھارت میں سیاسی کشیدگی کے باعث 13 سال سے کوئی دو طرفہ سیریز نہیں ہوئی ہے اور بھارت صرف آئی سی سی ایونٹس اور ایشیا کپ میں ہی پاکستان کے ساتھ کھیلتا ہے۔
قابل ذکر یہ ہے کہ اے سی سی کا ایونٹ ایشیا کپ رواں برس بھارت کی میزبانی میں ہوگا جبکہ ایشین کرکٹ کونسل (اے سی سی) کی سربراہی پاکستان کے پاس ہے اور چیئرمین محسن نقوی ہیں۔
