کوئٹہ: ہزار گنجی نیشنل پارک میں پرشین لیپرڈ کا جوڑا دریافت ہوا،وائلڈلائف حکام کا کہنا ہے کہ پرشین لیپرڈکی یہ نسل دنیامیں تیزی سے معدومی کا شکار ہے۔
تفصیلات کے مطابق محکمہ جنگلات وجنگلی حیات نے کوئٹہ کے نواحی علاقے ہزارگنجی نیشنل پارک میں دریافت ہونے والے نایاب تیندوے کی تصاویرجاری کردی ہے۔
چیف کنزرویٹوآفیسر شریف الدین بلوچ کا کہنا ہے کہ پرشین لیپرڈکی یہ نسل دنیامیں تیزی سےمعدومی کاشکارہے، 6 ماہ کی کوششوں سے ٹیم نے جوڑےکی عکس بندی کی۔
وائلڈلائف حکام نے بتایا کہ اس علاقے میں کئی دہائیوں سے رشئین لیپرڈ کی موجودگی اطلاع تھی لیکن پرشین لیپرڈ جوڑے کی کوہ چلتن میں آثار ملنے پر تلاش شروع کی گئی، چیتےکی عکس بندی محکمہ جنگلی حیات ٹیم کی بڑی کامیابی ہے۔
محکمہ جنگلی حیات نے آئی یوسی این،ڈبلیوڈبلیوایف سے رابطے کا فیصلہ کرتے ہوئے کہا ہے کہ چیتے میں چستی اور بے خوفی دیکھی گئی جوخوش آئند ہے، چیتےکی کوہ چلتن میں خوراک بھی وافرمقدارمیں موجود ہے۔
انھوں نے کہا کہ ان چیتوں کے تحفظ کے لیے ہمیں جہاں مزید وسائل اور عملے کی ضرورت ہو گی وہاں ہم لوگوں سے بھی درخواست کرتے ہیں کہ وہ ان چیتوں کی حفاظت کے لیے اپنا کردار ادا کریں۔
محکمہ جنگلات کے چیف کنزرویٹر نے مزید بتایا کہ کہ 2011-12 میں مکران کے علاقے کلگ میں اس چیتے کے شکار کا واقعہ رپورٹ ہوا تھا، اس کے بعد 2013 میں سکھر کے قریب ایک چیتے کی موجودگی رپورٹ ہوئی لیکن اس کے بعد پہلی مرتبہ یہاں ثبوت اور تصاویر کے ساتھ ان کی موجودگی کی تصدیق ہوئی ہے۔
