کولمبو: پاکستان اور افغانستان کے درمیان سیریز کا تیسرا ون ڈے میچ آج کھیلا جائے گا، افغانستان کے خلاف تیسرے ون ڈے میچ میں قومی ٹیم میں تبدیلیوں کا امکان ہے۔
سیریز کے تیسرے ون ڈے میں دونوں ٹیمیں کولمبو کے تاریخی کرکٹ گراؤنڈ میں ایک دوسرے کے مدمقابل آئیں گی، سیریز میں پاکستان کو 0-2 کی فیصلہ کُن برتری حاصل ہے، تیسرا ون ڈے میچ جیت کر پاکستان ٹیم ون ڈے رینکنگ میں نمبر ون پوزیشن پر آ جائے گی۔
ذرائع کے مطابق پاکستان کی پلیئنگ الیون میں کم از کم تین تبدیلیاں کی جائیں گی، قومی ٹیم مینجمنٹ نے سیریز اپنے نام کرنے کے بعد تبدیلیوں کا فیصلہ کیا ہے۔
ٹیم مینجمنٹ نے پلیئنگ الیون میں چار تبدیلیوں کے بارے میں بھی غور کیا ہے، سعود شکیل کو پلیئنگ الیون میں شامل کرنے کا فیصلہ کیا گیا ہے جب کہ فہیم اشرف، محمد نواز اور محمد وسیم کو بھی آخری میچ میں موقع دیا جا سکتا ہے۔
نسیم شاہ نے پاکستان کو کامیابی دلوا دی، افغانستان کو شکست
ان کی جگہ افتخار احمد، اسامہ میر، نسیم شاہ اور حارث رؤف کو آرام دینے کی تجویز ہے، پلیئنگ الیون کا حتمی فیصلہ ٹاس سے قبل کیا جائے گا۔
واضح رہے کہ سیریز کا دوسرا میچ پاکستان محض ایک وکٹ سے جیتا تھا جبکہ پہلے میچ میں افغان ٹیم کو 142 رنز کے بڑے مارجن سے زیر کیا تھا۔
