ٹی ٹوئنٹی ایشیا کپ میں ناخوشگوار واقعے کے بعد رواں ماہ پاک افغان سیریز میں دونوں ممالک کے تماشائیوں کو اسٹیڈیم میں الگ الگ بٹھانے پر غور کیا جا رہا ہے۔
پی سی بی منیجمنٹ کمیٹی کے سربراہ نجم سیٹھی نے کہا ہے کہ پاک افغان ٹی ٹوئنٹی سیریز کے دوران کسی بھی قسم کے ناخوشگوار واقعے سے بچنے کے لیے سخت سیکیورٹی اقدامات کیے ہیں۔
نجم سیٹھی کا کہنا ہے کہ دبئی میں افغان حکام کے ساتھ بات ہوئی تھی کی آپ کے کھلاڑیوں اور کراؤڈ کو کون سنبھالے گا اور ان کی کیا گارنٹی ہے؟ کیونکہ ماضی کا تجربہ اتنا اچھا نہیں رہا۔
چیئرمین پی سی بی نے بتایا کہ افغان حکام کی جانب سے دو ضمانتیں دی گئیں جن میں ایک تو یو اے ای کی انتظامیہ نے اب کوئی نیا انتظام کیا ہے جس میں ان کی کوشش ہو گی کہ پاکستان اور افغانستان کے سپورٹرز ایک جگہ نہ بیٹھیں۔ دوسری ضمانت یہ ہے کہ قوانین کی خلاف ورزی کرنے والوں کے خلاف بڑی سختی سے ایکشن لیا جائے گا۔
ان کا کہنا تھا کہ ویسے بھی یہ افغانستان اور ہمارا ایشو نہیں ہے۔ سیریز کی میزبانی شارجہ کر رہا ہے اور اس حوالے سے شارجہ کی انتظامیہ نے پہلے سے ہی فیصلہ کر رکھا ہے۔
نجم سیٹھی نے بتایا کہ میری افغان کرکٹ بورڈ کے حکام کے ساتھ یہ بات بھی ہوئی تھی کہ برائے مہربانی آپ اپنے کھلاڑیوں کو سمجھا لیں کہ ہار جیت ہوتی ہے، ہمیں ہار جیت کا کافی تجربہ ہے اس لیے ہم اپنے جذبات کو کنٹرول کر لیتے ہیں مگر آپ نئے نئے آئے ہیں اس لیے ذرا خیال رکھیے گا۔
واضح رہے کہ گزشتہ سال ٹی ٹوئنٹی ایشیا کپ کے دوران پاکستان سے میچ ہارنے پر افغان تماشائیوں نے پاکستانی تماشائیوں پر کرسیاں پھینکی تھیں اور مغلظات بکی تھیں جس پر یو اے ای انتظامیہ نے ایکشن بھی لیا تھا۔
پاکستان اور افغانستان کے درمیان تین ٹی ٹوئنٹی میچز کی سیریز 24 سے 27 مارچ تک شارجہ میں کھیلی جائے گی۔
