راولپنڈی : یوم شہداء کشمیر پر مسلح افواج نے شہدا کشمیر کو خراج عقیدت پیش کرتے ہوئے کہا انشااللہ کشمیریوں کی قربانیاں رنگ لائیں گی،بھارتی فوج جبر سے کشمیریوں کی سیاسی جدوجہد نہیں دبا سکتی۔
تفصیلات کے مطابق ڈی جی آئی ایس پی آر میجر جنرل آصف غفور نے یوم شہداءکشمیر کے موقع پر سماجی رابطے کی ویب سائٹ ٹوئٹر پر مسلح افواج کی جانب سے شہداء کشمیر کو خراج عقیدت پیش کیا۔
ڈی جی آئی ایس پی آر نے کہا مقبوضہ کشمیرمیں بھارتی فورسزکاظلم جاری ہے، انشااللہ کشمیریوں کی قربانیاں رنگ لائیں گی،بھارتی فوج جبر سے کشمیریوں کی سیاسی جدوجہد نہیں دبا سکتی اور کشمیریوں کو حق خودارادیت سے کوئی محروم نہیں کرسکتا۔
Tribute to Kashmiri martyrs of 6 Nov 1947 & till date on KashmirMartyrsDay. Their great sacrifices shall accrue result IA.Continued atrocities by Indian Occupation forces can never suppress just political struggle for their legitimate right of self determination.#KashmirBlackDay
— Maj Gen Asif Ghafoor (@OfficialDGISPR) November 6, 2018
یاد رہے مقبوضہ کشمیر میں یوم شہدا جموں آج منایا جا رہا ہے، چھ نومبر کو ڈوگرہ فوج نے لاکھوں کشمیریوں کو بدترین تشدد کر کے شہید کیا تھا۔
اس دن ڈوگرہ فوج اور ہندو بلوائیوں نے ایک سازش کے تحت جموں کے نہتے مسلمانوں کا قتل کیا، مسلمانوں کا خون اس بے دردی سے بہایا گیا جس کی تاریخ انسانی میں مثال نہیں ملتی ۔
یوم شہدائے جموں اس عزم کی تجدید کے لیے منایا جاتا ہے کہ جموں کے مسلمانوں نےقیمتی جانوں کا نذرانہ جس مقصد کے حصول کے لیے پیش کیا تھا اس مقصد کو نہ تو فراموش کیا جائے گا اور نہ ہی اس کے حصول میں آئندہ کسی بڑی سے بڑی قربانی سے دریغ کیا جائے گا۔
چھ نومبر یوم شہداء جموں تحریک آزادی کشمیر کا سنگ میل ہے ، اس دن لاکھوں کشمیریوں نے پاکستان کی محبت ، بھارت سے وطن کی آزادی کیلئے اپنی جانوں کا نذرانہ پیش کیا۔
